Meta-ն տուգանվել է 567 միլիոն դոլարով՝ իր հարթակներում երեխաների անվտանգության հետ կապված գործով
3 րոպեի ընթերցում
Ամերիկյան Նյու Մեքսիկոյի նահանգի դատավորը Meta ընկերությանը պարտավորեցրել է վճարել 567 միլիոն դոլար՝ հիմնվելով պնդումների վրա, որ սոցիալական ցանցերի հսկան ստեղծել է հասարակական անհարմարություն և վնաս պատճառել երեխաներին։ «Արմենպրես»-ի փոխանցմամբ՝ այս մասին հաղորդում է Euronews-ը։
«Մենք համաձայն չենք որոշման հետ և կբողոքարկենք», - նշել է Meta-ն հայտարարության մեջ՝ հավելելով, որ իրենք «ջանասիրաբար աշխատում են մարդկանց անվտանգությունն ապահովելու համար և թափանցիկ են եղել չարագործների և վնասակար բովանդակության նույնականացման և հեռացման մարտահրավերների առումով»։
Եզրափակիչ ելույթների ժամանակ մեղադրող Լինդա Սինգերը նշել է, որ Meta-ի ալգորիթմներն ակտիվորեն ուղղորդում էին մեծահասակներին դեպի դեռահաս օգտատերերի կողմից հրապարակված բովանդակությունը, մինչդեռ Meta-ն թաքցնում էր երիտասարդներին սպառնացող ռիսկերի վերաբերյալ ներքին եզրակացությունները։
Փոխհատուցման մեծ մասը` 420 միլիոն դոլարի չափով, կուղղվի տուժած երիտասարդներին օգնելու ծրագրերին: Մնացած միջոցները կօգտագործվեն, ի թիվս այլ բաների, ուսուցիչների և առողջապահության ոլորտի աշխատողների վերապատրաստման համար՝ սոցիալական ցանցերում դեռահասների վրա վնասակար ազդեցության դեմ պայքարելու ոլորտում։
Մինչ այս՝ մարտին, ընկերությանը պարտավորեցրել էին Նյու Մեքսիկոյին որպես փոխհատուցում վճարել 375 միլիոն դոլար, երբ այն մեղավոր էր ճանաչվել երեխաներին վտանգի ենթարկելու համար՝ նրանց իր հարթակներում ոտնձգություններ կատարող անձանց նկատմամբ խոցելի դարձնելով, ի թիվս այլ վնասների։
Մարտին դատարանը եզրակացրել էր, որ Meta-ն խախտել է նահանգի «Անարդար գործելակերպի մասին» օրենքը՝ սպառողներին մոլորեցնելով երեխաների համար նախատեսված հարթակների անվտանգության վերաբերյալ։
Նյու Մեքսիկոյի գործը բխել է Նյու Մեքսիկոյի նահանգի փաստաբանների կողմից 2023 թվականին հարուցված դատական հայցից, որտեղ պնդվում էր, որ Meta-ն պետք է պատասխանատվություն կրի այն բանի համար, թե ինչպես են իր հարթակները, վտանգելով երեխաներին, ենթարկել նրանց սեռական բնույթի բացահայտ նյութերի և սեռական ոտնձգություններ կատարողների հետ շփման։