Ռուբեն Ռուբինյանն ընտրվեց Ազգային ժողովի նախագահ

Իններորդ գումարման Ազգային ժողովի նախագահ ընտրվեց Ռուբեն Ռուբինյանը։

Հաշվիչ հանձնախմբի նախագահ Լիլիթ Մինասյանը տեղեկացրեց, որ ԱԺ 105 պատգամավորներից քվեարկությանը մասնակցել են 91-ը։ Ազգային ժողովի նախագահի պաշտոնում Ռուբինյանի թեկնածության օգտին քվեարկել է 63, դեմ՝ 28 պատգամավոր։

«Հարգելի գործընկերներ, կրկին շնորհակալություն եմ հայտնում իմ թեկնածությունն առաջադրելու և իմ օգտին քվեարկելու համար։ Սա ինձ համար մեծագույն պատիվ է և ես ամբողջությամբ պատկերացնում եմ այն պատասխանատվությունը, որը գալիս է այս որոշման հետ միասին և ամեն ինչ կանեմ ձեզ չհիասթափեցնելու համար։ Հարգելի ընդդիմադիր գործընկերներ, այն փաստը, որ դուք չեք քվեարկել իմ օգտին, ոչինչ չի նշանակում մեր հարաբերություններում։ Ես պատրաստվում եմ լինել ամբողջ Ազգային ժողովի նախագահը»,- հայտարարեց Ռուբեն Ռուբինյանը, որի թեկնածությունն ԱԺ նախագահի պաշտոնում առաջադրել էր իշխող «Քաղաքացիական պայմանագիր» խմբակցությունը։

Նշենք, որ ԱԺ «Հայաստան» խմբակցության ղեկավար Աննա Գրիգորյանը հայտարարել էր, որ խմբակցությունը չի մասնակցի Ազգային ժողովի նախագահի ընտրության հարցով անցկացվելիք փակ քվեարկությանը։  

ԱԺ «Ուժեղ Հայաստան» խմբակցության ղեկավար Նարեկ Կարապետյանն էլ հայտարարել էր, որ խմբակցությունը դեմ է քվեարկելու ԱԺ նախագահի պաշտոնում առաջադրված Ռուբեն Ռուբինյանի թեկնածությանը։

Հայաստանում հունիսի 7-ին կայացած խորհրդարանական ընտրությունների արդյունքներով ձևավորված խորհրդարանում ներկայացվածություն ունեն իշխող         «Քաղաքացիական պայմանագիր» կուսակցությունը (64 մանդատ) և ընդդիմադիր «Ուժեղ Հայաստան» (29 մանդատ) և «Հայաստան» (12 մանդատ) դաշինքները։