ՀՀ վարչապետն անդրադարձել է, թե ինչն է խանգարում Հայաստանի և Ռուսաստանի փոխհարաբերություններին

ՀՀ կառավարության նիստին հաջորդած ճեպազրույցում վարչապետ Նիկոլ Փաշինյանը ևս մեկ անգամ անդրադարձել է Հայաստանի Հանրապետության և Ռուսաստանի Դաշնության փոխհարաբերություններին։

«Խնդիրը հետևյալի մեջ է՝ Հայաստանը որոշել է ունենալ այլընտրանքներ։ Մինչև այս Հայաստանը չի ունեցել այլընտրանքներ, ռազմավարական հարաբերություններ ոչ տնտեսական, ոչ էլ քաղաքական առումով։ Հիմա Հայաստանը ռազմավարական հարաբերությունների փաստաթուղթ է ստորագրել Չինաստանի, ԱՄՆ-ի, Մեծ Բրիտանիայի, Հոլանդիայի, Ֆրանսիայի և բազմաթիվ այլ պետությունների հետ, և Ռուսաստանը խնդիր է տեսնում այդտեղ։ Ռուսաստանը գտնում է, որ կամ էքսկլյուզիվ են հարաբերությունները, կամ հարաբերություններ չպետք է լինեն։ Մենք չենք ընդունում այդ մոտեցումը։ Մենք ասում ենք՝ հարաբերություններն էքսկլյուզիվ չեն, բայց հարաբերություններ պետք է լինեն։ Սա լեգիտիմ դիրքորոշում է»,– «Արմենպրես»-ի փոխանցմամբ՝ հայտարարեց Փաշինյանը։

Անդրադառնալով լրագրողի հարցին, թե Հայաստանն ի վերջո լավ գործընկեր է, թե լավ գործընկեր չէ, Փաշինյանը նկատեց․

«Հայաստանը 2022 թվականին ինչո՞վ լավ գործընկեր չէր, որ ՀԱՊԿ-ն իր գործառույթները չկատարեց։ Ի՞նչ էր արել Հայաստանի Հանրապետությունը, ո՞ւմ էր վատություն արել։ Ինչո՞վ էր Հայաստանի Հանրապետությունը վատը, որ Ղարաբաղում ռուս խաղաղապահներն իրենց գործառույթները չկատարեցին։ 2022 թվականի հոկտեմբերի 6-ի մե՞ջ է խնդիրը․բայց դրանից առաջ դեպքեր են եղել։ Ինչո՞ւ է անընդհատ հնչում կանխավարկած, որ մենք ենք վատ գործընկեր։ Կամ Հայաստանի Հանրապետությունն ի՞նչ էր արել ոևէ մեկին, Բելառուսին վատություն է՞ր արել, որ Բելառուսի նախագահը հայտարարի, թե Հայաստանն ո՞ւմ է պետք։ Հարգարժան գործընկերը՝ բելառուսի նախագահը, փնտրում–փնտրում ու չէր գտնում այդ հարցի պատասխանը։ Ինչպե՞ս կարելի է ինքնիշխան երկրի մասին այդպես խոսել։ Հիմա մենք ցույց ենք դնում թե ում է պետք Հայաստանի Հանրապետությունը, և այդ բոլոր գործընկեր երկրներն էլ Հայաստանի Հանրապետությանն են պետք։  Ես խնդրում եմ, որ մեր դիրքավորմանը մոտենան ըմբռնումով և հարգանքով, մանավանդ որ գործնականում դրա լեգիտիմությունը կասկածի տակ չի առնվում»,- ասաց ՀՀ վարչապետը։