3 րոպեի ընթերցում
Ռուսաստանը հուլիսի 29-ին հայտարարել է, որ Telegram-ի հիմնադիր և գործադիր տնօրեն Պավել Դուրովի նկատմամբ միջազգային հետախուզում է հայտարարել՝ «ահաբեկչությանը հանցակցության» մեղադրանքով։ «Արմենպրես»-ի փոխանցմամբ՝ այս մասին հաղորագրություն է տարածել Ռուսաստանի Անվտանգության դաշնային ծառայության (ԱԴԾ) հանրային կապերի կենտրոնը։
«Միջազգային հետախուզում է հայտարարվել Telegram-ի վարչակազմի ղեկավար Պ. Դուրովի նկատմամբ», - նշված ԱԴԾ հայտարարության մեջ։
Մոսկվան մեղադրում է Ռուսաստանում ծնված Դուրովին Ուկրաինայի հետախուզական գործակալությունների և «ահաբեկչական ու ծայրահեղական կազմակերպությունների» կողմից օգտագործվող ալիքները, չաթերը և բոտերը չհեռացնելու համար, որոնք, ըստ ԱԴԾ-ի հայտարարության, «օգտագործվել են Ռուսաստանի տարածքում դիվերսիոն-ահաբեկչական գործողությունների, զանգվածային սպանությունների նախապատրաստման և համակարգման և կիբեռհանցագործությունների իրականացման համար, ինչը հանգեցրել է բազմաթիվ մարդկային զոհերի, այդ թվում՝ կանանց և երեխաների շրջանում, ինչպես նաև պատճառել է միլիարդների նյութական վնաս»։
Դուրովը, որը տարիներ շարունակ ապրել է Ռուսաստանից դուրս և ունի Ֆրանսիայի և ԱՄԷ-ի անձնագրեր, գործը որակել է որպես քաղաքական դրդապատճառներով լի՝ Telegram-ում նշելով, որ Ռուսաստանի իշխանությունները պատրվակներ են փնտրում երկրի տարածքում հարթակի հասանելիությունը սահմանափակելու համար։
Telegram-ը Ռուսաստանում ամենատարածված հաղորդակցման հարթակներից մեկն է՝ տասնյակ միլիոնավոր ակտիվ օգտատերերով։ Euronews-ը նշում է, որ ՌԴ պաշտոնյաները տարիների ընթացքում բազմիցս փորձեր են արել արգելափակել կամ սահմանափակել ծառայությունը կամ ստիպել Դուրովին փոխանցել այս կամ այն օգտատիրոջ տվյալները։
41-ամյա Դուրովը բնակվում է Ֆրանսիայում, որտեղ նույնպես իրավական խնդիրների է բախվել Telegram-ում անօրինական բովանդակության տարածման մեղադրանքների պատճառով։
Դուրովը նաև հիմնադրել է Ռուսաստանում հայտնի VKontakte սոցիալական ցանցը, սակայն ստիպված է եղել հեռանալ ընկերությունից, քանի որ այն ճնշման է ենթարկվել իշխանությունների կողմից 2010-ականների կեսերին, երբ հիմնադրվել է Telegram-ը։