2 րոպեի ընթերցում
2026 թվականի հուլիսի 22-ից 26-ը Հայաստանի առագաստանավային սպորտի ֆեդերացիան Գեղարքունիքի մարզի Սևան համայնքում անց է կացնում Ծովակալ Իսակովի անվան ամենամյա հուշամրցաշարը, որին մասնակցում են առագաստանավորդներ Հայաստանից, Ռուսաստանից և Վրաստանից:
Ինչպես «Արմենպրես»-ին տեղեկացրին Սևանի համայնքապետարանի աշխատակազմից, Սևանի առագաստանավային սպորտի մարզաբազան եւ միությունը այս տարի ևս հուշամրցաշարին պատրաստվել են ամենայն պատասխանատվությամբ: Հայաստանի առագաստանավային սպորտի ֆեդերացիայի փոխնախագահ Սմբատ Հակոբյանը նշում է, որ սպորտաձևի տարածման ու զարգացման համար անհրաժեշտ է ամեն ինչ անել, քանի որ առագաստանավային դպրոցը, որը գործում է Սևանում, նախկինում տվել է օլիմպիական խաղերի, աշխարհի ու Եվրոպայի առաջնությունների, միջազգային մրցումների բազում հաղթողներ եւ մրցանակակիրներ: «Պետք է ավանդույթները շարունակել, ինչի ուղղությամբ այսօր ֆեդերացիան քայլեր է ձեռնարկում: Այս հուշամրցաշարն էլ իր հերթին ուղղված է առագաստանավային սպորտի մասսայականացմանը»,-նշել է Սմբատ Հակոբյանը։
Հուշամրցաշարը կդատեն միջազգային կարգի մրցավարներ։ Սևանա լճում անցկացվող առագաստանավային սպորտի բաց առաջնությունը կշարունակվի մինչև հուլիսի 26-ը: Հաղթողները կպարգևատրվեն պատվոգրերով, մեդալներով և նվերներով:
Խոսրով Խլղաթյան