Ուկրաինական ԱԹՍ-ները հարվածներ են հասցրել Սանկտ Պետերբուրգի նավթային ենթակառուցվածքներին

Ուկրաինայի նախագահ Վոլոդիմիր Զելենսկին հայտարարել է, որ ուկրաինական զինված ուժերը հուլիսի 3-ի երեկոյան ԱԹՍ-ներով հարվածներ են հասցրել Ռուսաստանի Դաշնության Սանկտ Պետերբուրգ քաղաքի մոտակայքում գտնվող նավթային ենթակառուցվածքներին:

«Արմենպրես»-ի հաղորդմամբ՝ այս մասին Զելենսկին գրառում է կատարել X-ի իր միկրոբլոգում՝ տարածելով նաև համապատասխան տեսանյութ:

Last night, our Ukrainian long-range sanctions against Russia over this war reached targets near St. Petersburg. Ukraine's Defense Forces struck port oil infrastructure that generates revenue for Russia's war, and there were also successful strikes on Kronstadt – an important… pic.twitter.com/bMHY3cL3rM

— Volodymyr Zelenskyy / Володимир Зеленський (@ZelenskyyUa) July 4, 2026

«Երեկ երեկոյան Ռուսաստանի դեմ այս պատերազմի պատճառով մեր ուկրաինական «երկարաժամկետ պատժամիջոցները» հասան Սանկտ Պետերբուրգի մոտակայքում գտնվող թիրախներին: Ուկրաինայի պաշտպանության ուժերը հարվածեցին նավահանգստային նավթային ենթակառուցվածքներին, որոնք եկամուտ են ապահովում Ռուսաստանի պատերազմի համար, ինչպես նաև հաջողությամբ հարվածներ հասցվեցին Կրոնշտադտին՝ կարևոր ռազմական թիրախին: Այն Ուկրաինայի պետական ​​սահմանից հեռավորությունը ավելի քան 850 կիլոմետր է»,-գրել է Ուկրաինայի նախագահը:

Ռուսական կողմը հաստատել է, որ ուկրաինական ԱԹՍ-ները զանգվածային հարձակում են գործել Սանկտ Պետերբուրգի ուղղությամբ:

«Հակաօդային պաշտպանության համակարգերը գործում են։ Գործող շտաբի առաջարկությունների համաձայն՝ ես խնդրում եմ Սանկտ Պետերբուրգի բնակիչներին մնալ իրենց տներում և դուրս չգալ մինչև անօդաչու թռչող սարքերի սպառնալիքի վերացումը»,-ռուսական լրատվամիջոցների փոխանցմամբ՝ հայտարարել է Սանկտ Պետերբուրգի նահանգապետ Ալեքսանդր Բեգլովը:

Նահանգապետը հայտնել է, որ հարձակման ժամանակ հարված է հասցվել նավթային տերմինալին, սակայն տուժածներ չկան։

Սանկտ Պետերբուրգի Պուլկովո օդանավակայանը դադարեցրել է գործունեությունը Լենինգրադի մարզում անօդաչու թռչող սարքերի հարձակման պատճառով։

ՌԴ պաշտպանության նախարարությունն, իր հերթին, հայտնել է, որ Ռուսաստանի հակաօդային պաշտպանության ուժերը հետ են մղել Սանկտ Պետերբուրգի վրա ԱԹՍ-ների հարձակումը, հարվածը հասցվել է Կիրովի շրջանում գտնվող նավթային տերմինալի տարածքին, տեխնածին հետևանքները վերացվել են: