2 րոպեի ընթերցում
Գեղարքունիքի մարզի Գավառ համայնքի Սարուխան գյուղի մշակույթի տանը տեղի է ունեցել հայկական մշակույթին և ազգային արվեստին նվիրված հաշվետու միջոցառում, որի ընթացքում ներկայացվել են մշակութային բաժինների սաների տարվա ստեղծագործական աշխատանքներն ու ձեռքբերումները։
Ինչպես «Արմենպրես»-ին տեղեկացրին Գավառի համայնքապետարանի աշխատակազմից, միջոցառման շրջանակում կազմակերպվել էին կավագործության, մանրանկարչության, հայկական դեկորատիվ-կիրառական արվեստի և գորգագործության աշխատանքների ցուցադրություններ, որոնք ներկայացնում էին սաների ստեղծագործական կարողությունները, ազգային արժեքների նկատմամբ նրանց հետաքրքրությունն ու սերը։
Միջոցառման ընթացքում մասնակիցները ներկայացրել են հայկական մշակույթի հարուստ ժառանգությունը՝ անդրադառնալով նրա պատմամշակութային արժեքներին, ճարտարապետությանը, խաչքարային արվեստին և այն բացառիկ դերակատարությանը, որն այն ունի մեր ազգային ինքնության պահպանման գործում։
Հնչել են խոսքեր հայ մշակույթի մեծանուն ներկայացուցիչների՝ Կոմիտասի, Արամ Խաչատրյանի, Հովհաննես Այվազովսկու և Շառլ Ազնավուրի ստեղծագործական ժառանգության մասին՝ ընդգծելով նրանց անգնահատելի ներդրումը համաշխարհային մշակույթի գանձարանում։
«Հաշվետու միջոցառումը դարձավ մշակութային տարվա գեղեցիկ ամփոփում՝ մեկտեղելով ազգային արվեստի տարբեր ճյուղերը, սաների ստեղծագործական ձեռքբերումներն ու հայկական մշակույթի նկատմամբ սերն ու նվիրումը։ Այս օրերին հաշվետու միջոցառումներ են տեղի ունենում նաև Գավառ համայնքի արվեստի ու մշակույթի մյուս կրթօջախներում, որտեղ մեր շնորհալի սաները հանդես են գալիս բարձրարվեստ կատարումներով կամ իրենց ստեղծագործությունների ցուցադրումներով»,-ներկայացրին Գավառի համայնքապետարանի աշխատակազմից։
Խոսրով Խլղաթյան