Անկարայում կայանալիք ՆԱՏՕ-ի գագաթնաժողովը դաշինքի համար շրջադարձային նշանակություն կունենա. Թուրքիայի պաշտպանության նախարար
2 րոպեի ընթերցում
Թուրքիայի ազգային պաշտպանության նախարար Յաշար Գյուլերը հայտարարել է, որ հուլիսի 7-8-ը Անկարայում կայանալիք ՆԱՏՕ-ի գագաթնաժողովը կարևոր շրջադարձային փուլ կդառնա դաշինքի ապագա ռազմավարական ուղղության ձևավորման գործում։
Ինչպես հաղորդում է «Արմենպրես»-ը, այս մասին հայտնում է թուրքական «Անադոլու» լրատվական գործակալությունը:
Բրյուսելում ՆԱՏՕ-ի պաշտպանության նախարարների հանդիպումից հետո լրագրողների հետ զրույցում Գյուլերն ընդգծել է, որ Անկարան գագաթնաժողովը դիտարկում է ոչ միայն որպես առաջնորդների հերթական հանդիպում, այլ նաև որպես դաշինքի անվտանգության նոր մարտահրավերներին հարմարվելու վճռականության արտահայտություն։
Նրա խոսքով՝ Թուրքիան՝ որպես ՆԱՏՕ-ի խոշորագույն ռազմական ներդրում ունեցող երկրներից մեկը, շարունակում է ակտիվ դերակատարում ունենալ դաշինքի գործունեության մեջ։ Գյուլերը նշել է, որ գագաթնաժողովում ակնկալվում է վերահաստատել կոլեկտիվ պաշտպանության սկզբունքը և քննարկել պաշտպանական ծախսերի ու ռազմական կարողությունների ավելացման հարցերը։
Թուրքիայի պաշտպանության նախարարը հայտարարել է նաև, որ ռուս-ուկրաինական պատերազմը ազդում է ոչ միայն հակամարտող կողմերի, այլև եվրոպական անվտանգության, էներգետիկ շուկաների և միջազգային առևտրի վրա։
Նրա խոսքով՝ Անկարան շարունակում է հավասարակշռված քաղաքականություն վարել և Մոնտրոյի կոնվենցիայի դրույթների իրականացմամբ նպաստում է Սև ծովում կայունության պահպանմանը։
Անդրադառնալով Մերձավոր Արևելքի իրավիճակին՝ Գյուլերը ողջունել է ԱՄՆ-ի և Իրանի միջև ձեռք բերված համաձայնությունը՝ նշելով, որ Թուրքիան աջակցում է տարածաշրջանային խաղաղությանն ու կայունությանը միտված նախաձեռնություններին։