ՍԴ-ն հայտնել է, թե ինչ ժամկետներում որոշում կընդունի խորհրդարանական ընտրությունների արդյունքները վիճարկող դիմումի վերաբերյալ

Սահմանադրական դատարանը Հայաստանում կայացած խորհրդարանական ընտրությունների արդյունքները չեղարկելու կամ երկրորդ փուլ նշանակելու վերաբերյալ «Ուժեղ Հայաստան» դաշինքի դիմումը կքննի և որոշում կընդունի դիմումի ընդունման օրվանից ոչ ուշ, քան 15 օր հետո։  

«Արմենպրես»-ի փոխանցմամբ՝ այդ մասին հաղորդագրություն է տարածել ՀՀ սահմանադրական դատարանը։  

«2026 թվականի հունիսի 19-ին «Ուժեղ Հայաստան» կուսակցությունների դաշինքի ներկայացուցիչը դիմում է ներկայացրել Սահմանադրական դատարան, որով վիճարկվում է Հայաստանի Հանրապետության Ազգային ժողովի 2026 թվականի հունիսի 7-ի ընտրությունների արդյունքներով ընդունված որոշումը:

Սահմանադրական դատարանը դիմումը մուտքագրվելուց հետո երկօրյա ժամկետում աշխատակարգային նիստում որոշում է դիմումի ընդունելիության հարցը:

Դիմումը վարույթ ընդունվելու դեպքում նշանակվում է զեկուցող դատավոր, որը գործը նախապատրաստում է դատաքննության: Ազգային ժողովի ընտրությունների արդյունքների վերաբերյալ վեճերով դատաքննությունն իրականացվում է բանավոր ընթացակարգով: Սահմանադրական դատարանը պարտավոր է գործը քննել և որոշում ընդունել դիմումի մուտքագրման օրվանից ոչ ուշ, քան 15 օր հետո»։  

«Ուժեղ Հայաստան» դաշինքը հունիսի 19-ին հայտնել է, որ Հայաստանում հունիսի 7-ին կայացած խորհրդարանական ընտրությունների արդյունքները չեղարկելու կամ ընտրությունների երկրորդ փուլ նշանակելու պահանջով դիմում է մուտքագրել Սահմանադրական դատարան։

«Հայաստան» դաշինքը և «Բարգավաճ Հայաստան» կուսակցությունը ևս հայտնել են, որ հունիսի 19-ին դիմում կներկանացնեն Սահմանադրական դատարան՝ պահանջելով չեղյալ հայտարարել ընտրությունների արդյունքները։ 

Հայաստանի կենտրոնական ընտրական հանձնաժողովը հունիսի 14-ին ամփոփել է հունիսի 7-ին կայացած խորհրդարանական ընտրությունների արդյունքները։ Ընտրությունների արդյունքներով խորհրդարան է անցել երեք քաղաքական ուժ՝ «Քաղաքացիական պայմանագիր» կուսակցությունը (726 հազար 819 ձայն, 49.7456 տոկոս), «Ուժեղ Հայաստան» դաշինքը (340 հազար 006 ձայն, 23.2710 տոկոս) և «Հայաստան» դաշինքը (144 հազար 983 ձայն, 9.9231 տոկոս): «Քաղաքացիական պայմանագիր» կուսակցությունը նոր ձևավորվելիք խորհրդարանում կունենա 64 մանդատ, «Ուժեղ Հայաստան» դաշինքը՝ 29 մանդատ, «Հայաստան» դաշինքը՝ 12 մանդատ։