3 րոպեի ընթերցում
Ընդդիմությունը ընտրակաշառքի միջոցով պատերազմի սպառնալիք է ստեղծել։ «Արմենպրես»-ի հաղորդմամբ՝ Ազգային ժողովում կառավարության հետ հարցուպատասխանի ժամանակ այս մասին հայտարարեց ՀՀ վարչապետ Նիկոլ Փաշինյանը։
Վարչապետը հիշեցրեց, որ նախընտրական քարոզարշավի ընթացքում «Քաղաքացիական պայմանագիր» կուսակցությունը քաղաքացիներին կոչ էր անում տեր կանգնել խաղաղությանը։ Նրա գնահատմամբ՝ Հայաստանի քաղաքացիները ընտրությունների արդյունքում տեր են կանգնել խաղաղության օրակարգին։
«Մեր գնահատականը միանշանակ է, որ Հայաստանի Հանրապետության քաղաքացին տեր է կանգնել խաղաղությանը»,- ասաց Փաշինյանը։
Վարչապետը միաժամանակ նշեց, որ ընտրությունների արդյունքներին պետք է նայել նաև արտաքին ընկալումների տեսանկյունից։ Նրա խոսքով՝ կարող էր տպավորություն ստեղծվել, թե Հայաստանում հարյուր հազարավոր քաղաքացիներ աջակցում են այն ուժերին, որոնք հանդես են գալիս խաղաղության օրակարգի վերանայման կամ նախկին հակամարտային օրակարգերի շարունակման օգտին։
Փաշինյանը շեշտեց, որ եթե այդպիսի ընկալում ձևավորվեր, դա կարող էր լրջորեն սրել ռազմաքաղաքական իրավիճակը։
«Եթե ընկալում ստեղծվի, որ Հայաստանի Հանրապետությունում 500 հազար մարդ կա, որ ասում է՝ մենք պետք է Ղարաբաղի շարժումը շարունակենք կամ գնանք ծովից ծով Հայաստան օրակարգով, դա շատ լրջորեն կսրի ռազմաքաղաքական իրավիճակը Հայաստանում»,- նշեց վարչապետը։
Նրա խոսքով՝ իրականում այդպիսի հանրային տրամադրություն չկա, իսկ ընտրությունների ընթացքում ընտրակաշառք բաժանվել է արտաքին ուժերի աջակցությամբ, որոնք շահագրգռված են տարածաշրջանում իրավիճակի ապակայունացմամբ։
«Մենք գիտենք իրողությունը։ Մենք գիտենք, որ չկա այդպիսի մարդ, այլ ընտրակաշառքը բաժանվել է արտաքին ուժերի օգնությամբ, ովքեր շահագրգռված են, որ տարածաշրջանը պայթի»,- ասաց Փաշինյանը։
Վարչապետի գնահատմամբ՝ հենց այդ պատճառով ընտրություններից հետո անհրաժեշտ էր արագ վերականգնել խաղաղության գործընթացի դինամիկան։
Նա այդ համատեքստում հիշատակեց ՀՀ անվտանգության խորհրդի քարտուղար Արմեն Գրիգորյանի և Ադրբեջանի նախագահի օգնական Հիքմեթ Հաջիևի հանդիպումը։
«Ընտրակաշառքով կոնկրետ պատերազմի սպառնալիք են ստեղծել։ Այդ ձևաչափով հանդիպում կազմակերպելու անհրաժեշտությունը հենց այդ սպառնալիքը կառավարելն էր»,- ընդգծեց վարչապետը։