55-ամյա կինը հանրային տրանսպորտում քաշել է կարգը պահպանող հսկիչի մազերից, հնչեցրել սեռական բնույթի հայհոյանքներ
2 րոպեի ընթերցում
Օրերս Մասիս քաղաքի բնակիչ 55-ամյա մի կին Երևանում հասարակական տրանսպորտում հարվածել է նույնականացման սարքին, քաշել կարգը պահպանող հսկիչի մազերից, հնչեցրել սեռական բնույթի հայհոյանքներ ու փորձել հարվածել։ «Արմենպրես»-ի փոխանցմամբ՝ այս մասին հաղորդագրություն է տարածել Ոստիկանությունը։
«Ներքին գործերի նախարարության օպերատիվ կառավարման կենտրոն ահազանգ է ստացվել Երևանի քաղաքապետարանի հասարակական կարգի պահպանության ծառայող կնոջից, որը հայտնել է, որ ինքը հսկիչ է, և Այվազովսկու փողոցում կանգնած հանրային տրանսպորտում իրենց պարտականությունները կատարելիս երեք հոգի հրմշտել են իրեն ու գործընկերուհուն, հարվածել ու հայհոյել։
Համայնքային ոստիկանության Էրեբունու բաժնից շտապ մեկնել է օպերատիվ խումբ։
Պարզվել է, որ ահազանգող տեսուչն ու նրա գործընկերուհին, վարչարարություն կատարելու համար, փորձել են նույնականացնել տոմս չունեցող անձանց, սակայն ուղևորներից մեկը՝ 55-ամյա մի կին, հարվածել է նույնականացման սարքին, քաշել կարգը պահպանող հսկիչի մազերից, հնչեցրել սեռական բնույթի հայհոյանքներ ու փորձել հարվածել՝ կոպիտ կերպով խախտելով հասարակական կարգը։ Մեկ այլ ուղևոր՝ Երևանի բնակիչ 51-ամյա տղամարդը, հրմշտել և քաշքշել է տեսուչներին ու պահանջել շարունակել ուղևորությունը։»,– ասված է հաղորդագրության մեջ։
Համայնքային ոստիկանները ձերբակալել են 55-ամյա կնոջը։ Կազմված փաստաթղթերի հետ նա ներկայացվել է Էրեբունի և Նուբարաշեն վարչական շրջանների քննչական բաժին։
Հանգամանքները պարզվում են։