Ռուբեն Ռուբինյանն ընտրակաշառք բաժանելու մեջ պատասխանատու է համարել ընդդիմադիր երեք ուժերի առաջնորդներին
2 րոպեի ընթերցում
ՀՀ Ազգային ժողովի փոխնախագահ Ռուբեն Ռուբինյանի պնդմամբ՝ ընտրակաշառք բաժանելու գործում պատասխանատվություն են կրում «Ուժեղ Հայաստանը»-ի, «Հայաստան» դաշինքի և «Բարգավաճ Հայաստան»-ի ղեկավարները։
«Արմենպրես»-ի հաղորդմամբ՝ այս մասին Ռուբեն Ռուբինյանը հայտարարել է լրագրողների հետ ճեպազրույցում՝ կոչ անելով իրավապահներին ընտրակաշառքների հետքերով գնալ մինչև վերջ։
«Ինձ համար և բանական ցանկացած մարդու համար ակնհայտ է, որ ինչ-որ մի «տասովշիկ» չէր կարող զարթնել և որոշել, որ ինքը պետք է ընտրակաշառք բաժանի իր շենքի բնակիչներին։ Ակնհայտ է, որ նախ՝ այդ գումարները տվել են և ակնհայտ է, որ տալուց հրահանգել են՝ սա քեզ փող, կգնաս, կմուծես, որպեսզի ընտրեն մեզ։ Ինձ համար ակնհայտ է, որ պատասխանատվություն են կրում «Ուժեղ Հայաստան»-ը, «Հայաստան» դաշինքը և «Բարգավաճ Հայաստան»-ը։ Ինձ համար նաև ակնհայտ է, որ այդ կուսակցությունների ղեկավարությունն է կազմակերպել և ուղղորդել այդ ընտրակաշառքները և ես կոչ եմ անում իրավապահներին բացահայտել այս սխեման»,-ասել է Ռուբինյանը։
Հիշեցնենք, որ Հայաստանում հունիսի 7-ին կայացած խորհրդարանական ընտրությունների նախընտրական քարոզարշավի ամբողջ հնթացքում Հայաստանի հակակոռուպցիոն կոմիտեն պարբերաբար հայտնում էր «Ուժեղ Հայաստան» դաշինքի, «Հայաստան» դաշինքի և «Բարգավաճ Հայաստան» կուսակցության ներկայացուցիչների կողմից ընտրակաշառք բաժանելու դեպքեր բացահայտելու մասին՝ ներկայացնելով նաև դրա մասին վկայող ձայնագրություններ։