1 րոպեի ընթերցում
Հայաստանի Հանրապետության վարչապետ Նիկոլ Փաշինյանը համոզված է, որ ընտրություններում ընտրակաշառք տված կամ վերցրած ցանկացած ոք պետք է խստորեն պատժվի։
«Արմենպրես»-ի հաղորդմամբ՝ հունիսի 9-ին կառավարությունում գործադիր մարմնի անդամների հետ հանդիպմանը Փաշինյանը նշեց, որ այդ հարցը երկրի անվտանգության և ժողովրդավարության հարց է։
«Եթե սրա համար անհրաժեշտ է իրականացնել օրենսդրական ինստիտուցիոնալ փոփոխություններ, այդ փոփոխություններն արժե հիմա, անհապաղ ձևով անել։ Սակայն ես չեմ կարծում, թե դրա համար անհրաժեշտ են փոփոխություններ։ Ընտրակաշառքների նկատմամբ կա հանդուրժողականություն։ Ես չեմ զարմանա, եթե պարզվի, որ նախորդ ընտրություններին, դրանց նախորդած ընտրություններին ընտրակաշառքի վրա բռնված ոչ մեկ այսօր բանտում չի։ Ով ՏԻՄ ընտրությունների ժամանակ բռնվել է, շարունակել է խորհրդարանական ընտրությունների ժամանակ, և նրանք էլ շարունակելու են առաջիկա ՏԻՄ ընտրություններում․․․
Ես հստակ պահանջում եմ, որ նրանք, ովքեր ընտրակաշառք վերցնելու կամ տալու մեջ բռնվել են, ինչ սոցիալական խավի ու պաշտոնի էլ լինեն, առնվազն մինչև հաջորդ համապետական ընտրությունների պաշտոնական ամփոփման օրը լինեն բանտում»,-հավելեց վարչապետը։