3 րոպեի ընթերցում
Վաշինգտոնում երկօրյա բանակցությունների արդյունքում ԱՄՆ-ում Լիբանանի դեսպան Նադա Համադե Մոավադը և ԱՄՆ-ում Իսրայելի դեսպան Եչիել Լեյթերը համաձայնության են եկել հրադադարի հարցում։ «Արմենպրես»-ի փոխանցմամբ՝ այս մասին հայտնում է ԱՄՆ պետքարտուղարությունը։
Հայտարարության մեջ նշվել է, որ հրադադարը կախված է «Հեզբոլլահ»-ի կողմից կրակի լիակատար դադարեցումից և Հարավային Լիտանիի հատվածից «Հեզբոլլահ»-ի բոլոր անդամների տարհանումից։
Երկու կողմերը համաձայնել են արագորեն առաջ մղել փորձնական գոտիների ստեղծումը, որտեղ Լիբանանի զինված ուժերը կստանձնեն տարածքի բացառիկ վերահսկողությունը:
«Այս քայլերը հնարավորություն կտան առաջընթաց գրանցել համապարփակ խաղաղության և անվտանգության համաձայնագրի ուղղությամբ»,- նշվել է հայտարարության մեջ։
Լիբանանն ու Իսրայելը նաև վերահաստատել են, որ միմյանց նկատմամբ թշնամական մտադրություններ չունեն և հանձնառու են «շարունակել ուղիղ բանակցությունները՝ վստահություն ձևավորելու, բոլոր չլուծված հարցերը կարգավորելու և երկու երկրների միջև համապարփակ համաձայնության հասնելու համար»։
«Միացյալ Նահանգներն ընդգծել է Լիբանանի զինված ուժերին աջակցելու իր մտադրությունը՝ նրանց կարողությունները բարելավելու և Լիբանանի տարածքում ինքնիշխանության արդյունավետ իրականացումը հնարավոր դարձնելու նպատակով», - ասվում է հայտարարության մեջ։
Իսրայելը վերահաստատել է, որ իր անվտանգությունը և տարածքային ամբողջականության նկատմամբ հարգանքը կարող են ապահովվել միայն «Հեզբոլլահ»-ի զինաթափման և Լիբանանի ողջ տարածքում դրա ենթակառուցվածքների ապամոնտաժման միջոցով։
Իր հերթին, Լիբանանը վերահաստատել է միջազգայնորեն ճանաչված սահմանների փոխադարձ հարգանքի, ռազմական գործողությունների դադարեցման ամբողջական իրականացման անհրաժեշտությունը։ Լիբանանը «պարտավորվել է ԱՄՆ աջակցությամբ ուժեղացնել Լիբանանի զինված ուժերի կարողությունները՝ ամբողջ երկրում արդյունավետ վերահսկողություն հաստատելու համար»։
Կողմերը համապարփակ համաձայնագրի հասնելու նպատակով համաձայնել են վերսկսել քաղաքական և անվտանգության հարցերով բանակցությունները հունիսի 22-ին: