1 րոպեի ընթերցում
Կոնգոյի Դեմոկրատական Հանրապետությունում (ԿԴՀ) էբոլա վիրուսով վարակման հաստատված դեպքերի թիվը հասել է 282-ի: «Արմենպրես»-ի փոխանցմամբ, այս մասին է վկայում Կոնգոյի Դեմոկրատական Հանրապետության առողջապահության նախարարության տարածած նոր հաշվետվությունը։
Ինչպես նշված է փաստաթղթում, բռնկումը շարունակում է հիմնականում տարածվել Իտուրիի նահանգում, որին բաժին է ընկնում հաստատված 282 դեպքերից 264-ը։ Հյուսիսային Կիվուի նահանգում գրանցվել է 15 հաստատված դեպք, ևս երեք դեպք է հայտնաբերվել Հարավային Կիվուի նահանգում։
Հաշվետվության համաձայն՝ մահացել է 42 մարդ, 238-ը բուժում է ստանում: Բացի այդ արձանագրվել է ապաքինման երկու դեպք։
ԿԴՀ իշխանություններն էբոլա տենդի բռնկման մասին հայտարարել են մայիսի 15-ին։ Հիվանդության հարուցիչ է դարձել Բունդիբուգյո վիրուսը, որն առաջին անգամ հայտնաբերվել է 2007 թվականին Ուգանդայում։
Ավելի վաղ հաղորդվել է, որ երկրում գրանցվել է վարակման ավելի քան 1000 ենթադրյալ դեպք և մոտավորապես 240 ենթադրյալ մահ։ Բռնկումը տարածվել է նաև հարևան Ուգանդայում, որտեղ հայտնաբերվել է վարակման ինը դեպք և գրանցվել է մեկ մահ: