2 րոպեի ընթերցում
Չինաստանը պատրաստ է համագործակցել Չեխիայի հետ՝ կապերը բարելավելու և ավանդական բարեկամությունը վերականգնելու նպատակով։ Ինչպես հաղորդում է «Արմենպրես»-ը՝ վկայակոչելով չինական պետական CCTV հեռուստատեսությունը, այս մասին մայիսի 27-ին Չինաստանի արտաքին գործերի նախարար Վան Ին ասել է Չեխիայի իր գործընկերոջը՝ Պետր Մաչինկային։
Դեկտեմբերից Չեխիայում իշխանության եկած նոր կառավարության օրոք Պրահան ձգտում է վերականգնել կապերը Պեկինի հետ, և Մաչինկան Վանի հետ հանդիպումից հետո ասել է, որ ինքը կցանկանար, որ երկու երկրները պրագմատիկ հարաբերություններ ունենան։
CCTV-ի տվյալներով՝ Չինաստանի ԱԳ նախարարն ասել է, որ երկու կողմերն էլ պետք է «ամրապնդեն երկխոսությունն ու համագործակցությունը, ամրապնդեն քաղաքական փոխադարձ վստահությունը և աստիճանաբար ընդլայնեն գործնական համագործակցությունը այնպիսի ոլորտներում, ինչպիսիք են տնտեսությունը, առևտուրը և զբոսաշրջությունը»։
Վան Ին հավելել է, որ Թայվանը Չինաստանի ներքին խնդիր է՝ հույս հայտնելով, որ Չեխիայի կառավարությունը «կկիրառի «Մեկ Չինաստանի» սկզբունքը... և կվերականգնի չին-չեխական հարաբերությունները առողջ զարգացման ուղու վրա»։
Այս հայտարարությունը պատահական չէ, քանի որ Թայվանի արտաքին գործերի նախարար Լին Չիա-լունգը անցյալ շաբաթ այցելել էր Պրահա և ելույթ էր ունեցել քաղաքում կազմակերպված ֆորումում։
Մաչինկան ասել է, որ կառավարությունը պաշտոնական շփումներ չի ունեցել Թայվանի ներկայացուցիչների հետ՝ հավատարիմ մնալով Չինաստանի հետ հարաբերությունների նախկին բնույթին։ «Չեխիայի կառավարության շահագրգռվածությունն է նորմալ հարաբերություններ ունենալ Չինաստանի հետ», - ասել է նա լրագրողներին Նյու Յորքում։
Մաչինկան հայտարարել է նաև, որ Վան Իին վստահեցրել է, որ այս տարվա սկզբին Չեխիայում չինական հետախուզության հետ համագործակցելու կասկածանքով ձերբակալված չինացի քաղաքացին դատավարության սպասման ընթացքում պահվում է նորմալ պայմաններում։