1 րոպեի ընթերցում
Աշխարհում մոտ 800 միլիոն մարդ ապրում է ծայրահեղ աղքատության պայմաններում: Ինչպես հաղորդում է «Արմենպրես»-ը, այդ մասին ասվում է ՄԱԿ-ի գլխավոր քարտուղար Անտոնիու Գուտերեշի հայտարարության մեջ՝ ուղղված Պեկինում աշխատանքները սկսած Աղքատության կրճատման և զարգացման գլոբալ համաժողովի մասնակիցներին։
«800 միլիոն մարդ՝ կանայք, երեխաներ և տղամարդիկ, նախկինի նման ապրում են ծայրահեղ աղքատության պայմաններում՝ հեռավոր գյուղական համայնքներից մինչև գերբնակեցված քաղաքային հետնախորշերը», - նշվում է ուղերձի տեքստում։ Փաստաթուղթն ընթերցել է Չինաստանում ՄԱԿ-ի մշտական համակարգող Սթիվեն Ջեքսոնը։
Համաշխարհային կազմակերպության գլխավոր քարտուղարի խոսքով՝ այդ մարդկանց իրավիճակը սաստկանում է հակամարտությունների, կլիմայի փոփոխության, խորացող անհավասարության և պարտքի ծանր բեռի պատճառով։ Նա կառավարություններին կոչ է արել ներդրումներ կատարել արժանապատիվ աշխատատեղերի, որակյալ կրթության, առողջապահության, գյուղական շրջանների կայուն զարգացման և համընդհանուր սոցիալական պաշտպանության բնագավառում։ Բացի այդ, Գուտերեշը նշել է անարդար համաշխարհային ֆինանսական համակարգի բարեփոխման անհրաժեշտությունը։