2 րոպեի ընթերցում
Հայաստանում հունիսի 23-ն առաջարկվում է սահմանել Հանրային ծառայողի օր: «Արմենպրես»-ի փոխանցմամբ՝ այս մասին որոշման նախագիծ է շրջանառել ՀՀ վարչապետի աշխատակազմի քաղաքացիական ծառայության գրասենյակը:
Օրենքի նախագծի հիմնավորման մեջ նշվում է, որ այժմ Հայաստանի Հանրապետությունում Մարմինների հիմնադրման կամ դրանց համար խորհրդանշական համարվող օրերը պաշտոնապես նշվում են որպես այդ կառուցների աշխատողների մասնագիտական տոներ և միջազգային օրեր: Այս իրավիճակն առաջացնում է հանրային ծառայության բազմազանություն, որը հակասում է հանրային ծառայության զարգացման ներկա օրակարգին։
«Այս համատեքստում հանրային ծառայության հորիզոնական շրջանակի միասնականության ապահովման, ինչպես նաև հանրային ծառայողների կողմից մատուցվող ծառայությունների արժեքը և հանրային ծառայողների ներդրումը երկրի զարգացման գործընթացում առանձնահատուկ ընդգծելու համար կարևորում ենք Հայաստանի Հանրապետությունում հռչակել հանրային ծառայողի մեկ միասնական օր»,- ասված է օրենքի նախագծում:
Նախագծի ընդունմամբ՝ Հայաստանի Հանրապետությունում հունիսի 23-ին պաշտոնապես կնշվի հանրային ծառայողի օրը:
«Նախագծի ընդունմամբ նախատեսվում է գնահատել, քաջալերել, խրախուսել, շահադրդել, արժևորել և ընդգծել հանրային ծառայողների դերն ու կարևորությունը երկրի կայուն զարգացման, հանրային ծառայությունների արդյունավետ մատուցման, նոր գաղափարների և արդեն իսկ ձեռքբերված փորձի կիրառմամբ միասնական քաղաքականության մշակման գործում»,- նշված է նախագծում:
2002 թվականի դեկտեմբերի 20-ին ՄԱԿ-ի Գլխավոր ասամբլեան 57/277 բանաձևով հունիսի 23-ը հռչակել է «Հանրային ծառայության օր», որի 3-րդ կետի համաձայն՝ «Գլխավոր ասամբլեան որոշում է, հունիսի 23-ը հռչակել Միավորված ազգերի կազմակերպության հանրային ծառայության օր և խրախուսում է անդամ պետություններին հատուկ միջոցառումներ կազմակերպել այդ օրը՝ ընդգծելու հանրային ծառայության ներդրումը զարգացման գործընթացում»: