Ալեն Սիմոնյանի խոսքով՝ ընդդիմադիր հիմնական ուժերը ընտրական շեմը հաղթահարելու խնդիր ունեն

ԱԺ նախագահ, «Քաղաքացիական պայմանագիր» կուսակցության  վարչության անդամ Ալեն Սիմոնյանը հայտարարել է, որ ընդդիմադիր հիմնական քաղաքական ուժերն առաջիկա խորհրդարանական ընտրություններում ընտրական շեմը հաղթահարելու խնդիր ունեն։

«Արմենպրես»-ի հաղորդմամբ՝ լրագրողների հետ ճեպազրույցում  Սիմոնյանն ասել է, որ ընդդիմությունը անելանելի վիճակում է։

«Ակնհայտ է, որ ընդդիմադիր հիմնական ուժ համարվող կուսակցությունները նվազագույն շեմը հաղթահարելու խնդիր ունեն»,- նշել է նա։

Նա քննադատել է «Հայաստան» դաշինքին և դաշինքի առաջնորդ Ռոբերտ Քոչարյանին՝ պնդելով, որ դաշինքը չի հաղթահարելու անհրաժեշտ շեմը։

««Հայաստան» դաշինքն ակնհայտորեն չի հաղթահարելու ընտրական շեմը։ Հայաստանի Հանրապետությունում 100 հազար ձայն հավաքելն իրենց համար անհնար է, և ես վստահ եմ դրանում։ Այդ պատճառով Ռոբերտ Քոչարյանը պատրաստ է ամեն ինչ անել՝ հաճոյանալ, բարի խոսքեր ասել, հայտարարել, թե Դուա Լիպային է սիրում, նույնիսկ վիրավորել, միայն թե մենք արձագանքենք իրեն»,- ասել է Սիմոնյանը։

Սիմոնյանի խոսքով՝ «Ուժեղ Հայաստան» դաշինքի շուրջ ստեղծված «շղարշը» ևս, իր գնահատմամբ, այլևս վերացել է։

««Ուժեղ Հայաստան» դաշինքի դեպքում ևս ակնհայտ դարձավ, որ այն խորհրդավոր շղարշը, թե իբր ինչ-որ նոր ուժ է հայտնվել, մարտ ամսին վերացավ։ Երբ «լույսերը միացան» և ամեն ինչ պարզ երևաց, պարզ դարձավ, որ այդ մարդիկ նույնիսկ հայերենի ուղղագրությանը չեն տիրապետում, չեն ճանաչում հայ հասարակությանը և պատկերացում չունեն, թե ինչի մասին են խոսում։

Արդյունքում մնում է միայն մեկ բան՝ վիրավորել, սադրել, ագրեսիա ցուցաբերել և փորձել հասկանալ, թե իշխանությունն ինչպես կարձագանքի»,- եզրափակել է Սիմոնյանը։

Սիմոնյանը կասկածի տակ է դրել նաև «Բարգավաճ Հայաստան» կուսակցության հնարավորություններն առաջիկա ընտրություններում։

Հայաստանում մայիսի 8-ից մեկնարկել է հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 17 կուսակցություն և 2 դաշինք։

Ընտրական օրենսգրքի համաձայն՝ կուսակցությունների համար նվազագույն շեմը 4 տոկոսն է, մինչև երեք կուսակցություններից բաղկացած դաշինքների համար՝ 8 տոկոսը, իսկ երեք և ավելի կուսակցություններից բաղկացած դաշինքների համար՝ 10 տոկոսը։ «Բարգավաճ Հայաստան» կուսակցությանն ընտրությունների արդյունքներով խորհրդարան անցնելու համար անհրաժեշտ կլինի ձայների 4 տոկոսը, «Հայաստան» դաշինքին, որը բաղկացած է 2 կուսակցությունից՝ ձայների 8 տոկոսը, իսկ «Ուժեղ Հայաստան» դաշինքին, որը բաղկացած է 3 կուսակցությունից՝ 10 տոկոս։