2 րոպեի ընթերցում
Թանգարանների գիշերը, որը տեղի կունենա մայիսի 16-ին, կանցկացվի «Թանգարանները միավորում են մասնատված աշխարհը» խորագրով։ Տոնի ամենայուրահատուկ միջոցառումներից մեկը կկայանա Խաչատուր Աբովյանի տուն-թանգարանում և կկրի «Շոշափելի արվեստ/շոշափելի տեխնոլոգիա» խորագիրը։
«Արմենպրես»-ի հաղորդմամբ՝ ծրագիրը Մշակույթի զարգացման հիմնադրամի, hosq հիմնադրամի և Rambalkoshe ժամանակակից արվեստի թանգարանի համատեղ նախաձեռնությունն է։
Նախագծի առանցքում է «նմուշին դիպչել կարելի՛ է» գաղափարը։ Ինտերակտիվ ծրագիրը նվիրված է ստեղծարար տեխնոլոգիաներին, ժամանակակից արվեստին և բազմազգայական փորձառություններին․ թանգարանը մեկ երեկոյի ընթացքում կվերածվի կենդանի միջավայրի, որտեղ արվեստը հնարավոր կլինի ոչ միայն տեսնել, այլև շոշափել, լսել, շարժել և փորձարկել։
Միջոցառումը նախատեսված է տարբեր տարիքային խմբերի համար։ Ծրագիրը նաև կրթական բաղադրիչ ունի․ յուրաքանչյուր գոտում նախատեսվում են պարզ բացատրություններ, կարճ ներկայացումներ և անմիջական շփումներ արվեստագետների հետ։
Նախագիծը նպատակ ունի հանդիսատեսի և ժամանակակից արվեստի միջև հեռավորությունը նվազեցնելու՝ ստեղծելով անմիջական, հասկանալի և մասնակցային փորձառություն։ Միաժամանակ այն ներկայացնում է Հայաստանում ստեղծարար տեխնոլոգիաների ներուժը։