1 րոպեի ընթերցում
Ուկրաինան և Գերմանիան մտադիր են խորացնել համագործակցությունը պաշտպանական ոլորտում՝ մասնավորապես անօդաչու տեխնոլոգիաների ուղղությամբ։ Ինչպես տեղեկացնում է «Արմենպրես»-ը, հղում անելով «Suspilne»-ը, այս մասին Ուկրաինա կատարած այցի ընթացքում հայտարարել է Գերմանիայի պաշտպանության նախարար Բորիս Պիստորիուսը։
Նրա խոսքով՝ գերմանական և ուկրաինական ընկերություններն արդեն աշխատում են տարբեր տեսակի անօդաչու թռչող սարքերի համատեղ նախագծերի վրա։
«Խոսքը վերաբերում է ինչպես մինչև 100 կմ հեռահարությամբ տակտիկական անօդաչուներին, այնպես էլ հեռահար համակարգերին, որոնք կարող են հաղթահարել մինչև 1500 կմ»,- նշել է Պիստորիուսը։
Նախարարի խոսքով՝ նման անօդաչուների զարգացումը կարևոր նշանակություն ունի ռուսական հարձակումներին հակազդելու և հակառակորդի հակաօդային պաշտպանության համակարգերը ճնշելու համար։
Պիստորիուսը նաև հայտարարել է, որ Գերմանիան հետաքրքրված է ուկրաինական մարտական փորձի ուսումնասիրությամբ։