Հարևանների նկատմամբ Հայաստանի մոտեցումների ուղենիշը խաղաղության, համագործակցության և զարգացման հանձնառությունն է. Արարատ Միրզոյան
2 րոպեի ընթերցում
Հայաստանը կատարել է ինքնիշխան ընտրություն՝ վարելու բալանսավորող և բալանսավորման արտաքին քաղաքականություն՝ հիմնված ոչ թե մեկ կենտրոնից կախվածության, այլ տարբեր ուղղություններով բովանդակային և փոխշահավետ գործընկերությունների ձևավորման վրա։
«Արմենպրես»-ի հաղորդմամբ՝ Երևանում մեկնարկած «Երևանյան երկխոսություն» միջազգային համաժողովին այս մասին ասաց ՀՀ արտաքին գործերի նախարար Արարատ Միրզոյանը։
Նրա խոսքով՝ Միացյալ Նահանգները, Ֆրանսիան ,Ղազախստանը, Չինաստանը և եվրոպական երկրների ընդլայնվող շրջանակը այսօր մաս են կազմում Հայաստանի ռազմավարական գործընկերությունների համայնապատկերում ոչ թե որպես միմյանց այլընտրանքներ, այլ որպես բազմազան և համագործակցային արտաքին քաղաքական ճարտարապետական հենասյուներ։
«Խաղաղության, համագործակցության և զարգացման հանձնառությունն է մեր հարևանների նկատմամբ մեր մոտեցումների ուղենիշը։ Թուրքիայի հետ հարաբերությունների կարգավորման գործընթացը արտացոլում է մեր այն համոզմունքը, որ բաց սահմաններն ու բարիդրացիական հարաբերությունները լավագույնս կծառայեն մեր ժողովրդի շահերին։ Վրաստանի հետ մենք շարունակում ենք խորացնել ռազմավարական գործընկերությունը՝ հիմնված փոխադարձ շահերի վրա, Իրանի հետ էլ մենք մշտապես պահպանել ենք բարեկամական կապերը և սերտ գործընկերությունը»,-ասաց նա։
Միրզոյանը վստահեցրեց , որ միայն դիվանագիտությունը բավարար չէ խաղաղության շարունակության համար։
«Երբ մենք կիսում ենք առևտրային ուղիները, էներգետիկ ցանցերը, թվային կապերը, մենք կիսում ենք նաև ռիսկերն ու օգուտները, հետևաբար մեր հարևանների հետ միասին կառուցելով Արևելքը Արևմուտքին և Հյուսիսը Հարավին կապող ենթակառուցվածքներ, մենք ստեղծում ենք մի իրականություն մեր տարածաշրջանում, որտեղ յուրաքանչյուր դերակատարն անձնական շահագրգռվածություն ունի հարևանի կայունության հարցում»,-ասաց նախարարը՝ հավելելով, որ դա է ընկած «Խաղաղության խաչմերուկ» նախաձեռնության և TRIPP նախագծի հիմքում։