Հայաստանի Ազգային ժողովի փոխխոսնակն ընդունել է Էստոնիայի խորհրդարանական պատվիրակությանը
3 րոպեի ընթերցում
Հայաստանը բարձր է գնահատում Էստոնիայի հետ սերտ եւ վստահելի հարաբերությունները՝ դրանք համարելով Եվրոպական միության հետ գործընկերության ընդլայնման առանցքային բաղադրիչ:
«Արմենպրես»-ի փոխանցմամբ՝ ինչպես հայտնում է ՀՀ Ազգային ժողովի հասարակայնության հետ կապերի և հաղորդակցության վարչությունը, այս մասին ասել է ՀՀ Ազգային ժողովի նախագահի տեղակալ Հակոբ Արշակյանը՝ Էստոնիայի Ռիյգիկոգուի Էստոնիա-Հայաստան խորհրդարանական բարեկամական խմբի պատվիրակության հետ հանդիպման ընթացքում:
Հանդիպումը տեղի է ունեցել ապրիլի 28-ին, որին մասնակցել են նաեւ Հայաստան-Լատվիա, Լիտվա, Էստոնիա բարեկամական խմբի ղեկավար Արուսյակ Ջուլհակյանն ու Հայաստանում Էստոնիայի արտակարգ եւ լիազոր դեսպան Մարգ Մարդիսալու-Կահարը:
Հակոբ Արշակյանը նշել է, որ Հայաստանը կարեւորում է երկու երկրների՝ քաղաքական երկխոսության շարունակական զարգացմանն ուղղված աշխատանքները՝ ընդգծելով փոխայցելությունների անհրաժեշտությունը: Նա համոզմունք է հայտնել, որ Երեւանում Էստոնիայի ռեզիդենտ դեսպանության հիմնումը կարեւոր դերակատարում կունենա համապարփակ գործակցության հետագա ընդլայնման գործում:
Ազգային ժողովի նախագահի տեղակալի խոսքով Հայաստանն առանձնակի կարեւորում է խորհրդարանական դիվանագիտությունը եւ Էստոնիայի հետ միջխորհրդարանական համագործակցության զարգացումը: Ըստ Հակոբ Արշակյանի՝ այն զգալի ներուժ ունի, եւ երկու երկրների խորհրդարանների բարեկամական խմբերն իրենց աշխատանքով կշարունակեն հետեւողականորեն ամրապնդել երկկողմ կապերը՝ հիմնված բարեկամության ու փոխադարձ հարգանքի երկարամյա ավանդույթների վրա:
ԱԺ փոխխոսնակը նշել է, որ Հայաստանը շահագրգիռ է ընդլայնելու Էստոնիայի հետ համագործակցությունը փոխադարձ հետաքրքրություն ներկայացնող բոլոր ուղղություններով:
Էստոնիայի Հանրապետության Ռիյգիկոգուի Էստոնիա-Հայաստան խորհրդարանական բարեկամական խմբի պատվիրակության ղեկավար Անդո Կիվիբերգը, շնորհակալություն հայտնելով ջերմ ընդունելության համար, վերահաստատել է Հայաստանին աջակցելու Էստոնիայի հանձնառությունը:
Հակոբ Արշակյանը պատասխանել է պատվիրակության անդամների հարցերին՝ անդրադառնալով տարածաշրջանային անվտանգությանը, Հայաստան-Թուրքիա հարաբերություններին: