Ակադեմիական քաղաքին զուգահեռ որոշ մարզերում կունենանք նաև մանկավարժական ուղղության բուհեր. Փաշինյան
2 րոպեի ընթերցում
Հայաստանի Հանրապետության կառավարությունը մոտ է այն որոշմանը, որ Ակադեմիական քաղաքին զուգահեռ որոշ մարզերում կլինեն նաև մանկավարժական ուղղության բարձրագույն ուսումնական հաստատություններ։
«Արմենպրես»-ի հաղորդմամբ՝ այս մասին ՀՀ վարչապետն ասել է Մարալիկում՝ Քաղաքացու օրվան նվիրված և «Իրական Հայաստանի գաղափարախոսությունը» խորագիրը կրող դասախոսության ժամանակ։
Դասախոսության ընթացքում անդրադառնալով կրթության թեմային՝ վարչապետը վստահեցրել է, որ ՀՀ կառավարությունը բարեփոխումներ է անում նաև բուհական համակարգում և ստեղծում է Ակադեմիական քաղաքը, որտեղ բավարար առաջադիմություն ունեցող ուսանողների համար կրթությունը կլինի անվճար։
«Հայաստանի այն մարզերում, որտեղ կան ԲՈՒՀ-եր, և մարզերի համար դրանց գոյությունը կարևոր է, մենք մեր միջազգային գործընկերների հետ խորհրդակցելով՝ եկել ենք այն եզրակացությանն ու պարզել ենք, որ նույնիսկ այս մոդելներում, որտեղ կան Ակադեմիական քաղաքների նման համակարգ, մարզերում նույնպես ԲՈՒՀ-երի անհրաժեշտությունն առաջանում է՝ հատկապես մանկավարժական մասնագիտությունների գծով։ Մենք հիմա շատ մոտ ենք այն որոշմանը, որ Ակադեմիական քաղաքին զուգահեռ կունենանք նաև մանկավարժական ուղղության ԲՈՒՀ-եր մարզերում։ Ոչ բոլոր մարզերում, բայց առնվազն որոշակի տրամաբանությամբ մենք դա կունենանք»,-նշել է ՀՀ վարչապետը։