2 րոպեի ընթերցում
ԱՄՆ նախագահ Դոնալդ Թրամփը հայտարարել է, որ Իսրայելը և Լիբանանը համաձայնել են ևս երեք շաբաթով երկարաձգել Իսրայելի և լիբանանյան «Հեզբոլլահ» շարժման միջև հրադադարը։ «Արմենպրես»-ի փոխանցմամբ՝ այս մասին նա գրել է Truth Social հարթակում Իսրայելի և Լիբանանի դեսպանների հետ հանդիպումից հետո։
Թրամփը տեղեկացրել է, որ ամերիկյան կողմից հանդիպմանը մասնակցել են ինքը, ԱՄՆ փոխնախագահը և պետքարտուղարը։
«Հանդիպումը լավ անցավ։ Միացյալ Նահանգները կաշխատի Լիբանանի հետ՝ օգնելու նրան պաշտպանվել «Հեզբոլլահ»-ից։ Իսրայելի և Լիբանանի միջև հրադադարը կերկարաձգվի երեք շաբաթով», - գրել է նա։
Թրամփը հավելել է, որ ակնկալում է մոտ ապագայում հյուրընկալել Իսրայելի վարչապետ Բենիամին Նեթանյահուին և Լիբանանի նախագահ Ժոզեֆ Աունին։
«Մեծ պատիվ էր մասնակցել այս պատմական հանդիպմանը», - հավելել է նա։
Կողմերի միջև հաստատված 10-օրյա հրադադարի ժամկետը կլրանա ապրիլի 27-ին։ Չնայած հաստատված հրադադարին, կողմերը շարունակել են փոխադարձ հարվածները։
Ապրիլի 14-ին Իսրայելի և Լիբանանի դեսպանների հետ հանդիպել էր ԱՄՆ պետքարտուղար Մարկո Ռուբիոն։ Այս հանդիպումները կարևոր քայլ են համարվում երկու հարևան երկրների համար, որոնք պաշտոնապես պատերազմի վիճակում են 1948 թվականից ի վեր։