1 րոպեի ընթերցում
Ուկրաինայի նախագահ Վոլոդիմիր Զելենսկին հայտարարել է, որ «Դրուժբա» խողովակաշարի վնասված հատվածի վերանորոգումն ավարտվել է։
«Արմենպրես»-ի հաղորդմամբ՝ այս մասին Վոլոդիմիր Զելենսկին նշել է իր Telegram ալիքում կատարած գրառման մեջ՝ հավելելով, որ նավթի հոսքը խողովակաշարով կարող է վերսկսվել։
Ավելի վաղ՝ Եվրոպական հանձնաժողովի ներկայացուցիչ Պաուլա Պինյուն ասել է, որ Եվրահանձնաժողովն Ուկրաինայի նախագահ Վոլոդիմիր Զելենսկուց սպասում է հայտարարության մոտ ժամանակներս «Դրուժբա» խողովակաշարով ռուսական նավթի մատակարարումների վերսկսման մասին։
Նրա խոսքով՝ դա անհրաժեշտ է Կիևին 90 միլիարդ եվրոյի ֆինանսավորման համար, որի վրա վետո են դրել Հունգարիան և Սլովակիան։
Հունվարի 27-ին Ուկրաինան դադարեցրել է իր տարածքով ռուսական նավթի մատակարարումները «Դրուժբա» խողովակաշարով դեպի Հունգարիա և Սլովակիա՝ նշելով, որ նավթամուղը վնասվել է ռուսական ավիահարվածների հետևանքով։ Հունգարիան և Սլովակիան արգելափակել են Կիևին 90 միլիարդ եվրո վարկի տրամադրումը և Ռուսաստանի դեմ պատժամիջոցների 20-րդ փաթեթը՝ պահանջելով նախ վերսկսել «Դրուժբա»-ի աշխատանքը: