Ոստիկանությունը դարձել է ՀՀ կայունության, ներքին անվտանգության և խաղաղության ամրապնդման հիմնասյուներից․ նախարար

Այսօր ոստիկանությունը ոչ միայն իրավապահ մարմին է, այլև Հայաստանի Հանրապետության կայունության, ներքին անվտանգության և խաղաղության ամրապնդման հիմնասյուներից մեկը։

«Արմենպրես»-ի հաղորդմամբ՝ այս մասին հայտարարել է ՀՀ ՆԳ նախարար Արփինե Սարգսյանը Ոստիկանության 108-րդ տարեդարձի առթիվ ՆԳՆ-ում կոլեգիայի հանդիսավոր նիստին։

«Ձևավորված են ոստիկանության բոլոր 4 հենասյունային ուղղությունները, որոնց ներուժը ողջ ծավալով, առավել քան երբևէ, կարևոր է պետականության շարունակականության խաղաղության ջանքերի ամրապնդման համար։ Մենք ձևավորել ենք դիմակայուն կուռ համակարգ այն հստակ գիտակցումով, որ որքան հզոր է Հայաստանի Հանրապետությունում ոստիկանությունը, այնքան հզոր է Հայաստանի Հանրապետությունը։ Այս առաքելությունը պահանջում է ոչ միայն մասնագիտական կարողություններ, այլև բարձր արժեքներ, խիզախություն և սկզբունքայնություն։ Եվ այս մեկտեղումն է, որ մեզ թույլ է տալիս արձանագրելու Հայաստանի Հանրապետության քաղաքացիների վստահության աճ՝ ցուցանիշը հասցնելով 61 տոկոսի։ Այս մեկտեղումն է, որ թույլ է տալիս միջազգային տարբեր ռեյտինգավորման համակարգերով Հայաստանի Հանրապետությունը դիտարկել անվտանգ պետություն։ Հայաստանն այս տեսանկյունից ընդգրկվել է «World Travel Index»-ի ճամփորդության համար աշխարհի ամենաապահով երկրների ցանկում և 193 երկրի շարքում 13-րդ տեղում է 90,27 գործակցով»,-ասել է նախարարը։

Անդրադառնալով համակարգի առջև ծառացած մարտահրավերներին, Սարգսյանն ընդգծել է, որ դրանք ընդգրկում են մտածողության փոփոխությունից մինչև համակարգի ավելի կայուն և զարգացած աշխատանքը, որոնք, նրա համոզմամբ, միասնական, հետևողական ջանքերով կհաղթահարվեն։

Գերատեսչության ղեկավարն իր խոնարհումն է հայտնել ոստիկանության 108-ամյա պատմության մեջ իրենց անմնացորդ ծառայությունը բերած հազարավոր ոստիկանների հիշատակին, ովքեր զոհվել են երկրի սահմանների պաշտպանության համար և ծառայողական պարտականությունները կատարելիս։

Սարգսյանը հավաստիացրել է, որ համակարգն ամուր և հուսալի հենարան է Հայաստանի Հանրապետության պետականության ամրապնդման զարգացման, խաղաղության ամրապնդման համար։

«Այդպիսի համակարգ եղել է, կա, և ոստիկանության ամբողջ համակարգը շարունակելու է լինել այդպիսին՝ ծառայելով Հայաստանի Հանրապետությանն ու Հայաստանի Հանրապետության քաղաքացուն։ Այսպիսով` ոստիկանության ուժը պետության կայունությունն է, ոստիկանության կարգապահությունը՝ օրենքի գերակայությունը, ոստիկանության ծառայությունը՝ պետականության շարունակականությունը»,-եզրափակել է ՆԳ նախարարը։