Երևանը կհյուրընկալի մանկական ուրոլոգիայի միջազգային գիտաժողով՝ համախմբելով ոլորտի առաջատար մասնագետներին

Ապրիլի 30-ին Երևանում տեղի կունենա «Մանկական ուրոլոգիայի միջազգային գիտաժողով»-ը՝ համախմբելով ոլորտի առաջատար մասնագետներին Հայաստանից և արտերկրից (ԱՄՆ, Ռուսաստան և ԱՊՀ երկրներ)։

Գիտաժողովը կդառնա տարածաշրջանում այս ոլորտի խոշոր մասնագիտական հարթակներից մեկը՝ նպատակ ունենալով խթանել մանկական ուրոլոգիայի զարգացումը, փորձի փոխանակումը և ժամանակակից բժշկական մոտեցումների ներդրումը։

Միջոցառման կազմակերպիչն է «Ուիգմոր կանանց և երեխաների հիվանդանոց»-ը, որտեղ վերջին տարիներին ձևավորվում և ակտիվորեն զարգանում է մանկական ուրոլոգիայի մասնագիտացված ուղղությունը։

Գիտաժողովին կմասնակցեն միջազգային ճանաչում ունեցող մասնագետներ աշխարհի առաջատար բժշկական կենտրոններից, այդ թվում՝

• Եվգենի Մինեվիչը (Ցինցինատիի մանկական հիվանդանոց, ԱՄՆ),
• Վիտալի Դուբրովը (Բելառուսի Հանրապետության գլխավոր մանկական ուրոլոգ),
• Իլյա Կագանցովը (Բարձր տեխնոլոգիաների բազմապրոֆիլ բժշկական կենտրոն "Բելոոստրով", ՌԴ),
• Սայդանվար Ագզամխոջաեվը (Տաշքենդի մանկական բժշկական ինստիտուտ, Ուզբեկստան),
• Սիմոն Պոլոյանը (Կրասնոյարսկի Ի.Ս. Բերզոնի անվան միջշրջանային թիվ 20 կլինիկական հիվանդանոցի մանկական վիրաբուժական կենտրոնի ղեկավար, ՌԴ)։

Գիտաժողովի շրջանակում կքննարկվեն մանկական ուրոլոգիայի արդիական թեմաներ, այդ թվում՝ միզուղիների բնածին արատներ, ֆունկցիոնալ և օբստրուկտիվ խանգարումներ, ինչպես նաև ժամանակակից վիրաբուժական մոտեցումներ՝ ներառյալ լապարոսկոպիկ և ռոբոտային միջամտությունները։

Առանձնահատուկ ուշադրություն կդարձվի վաղ ախտորոշմանը և միջդիսցիպլինար մոտեցմանը, որոնք առանցքային նշանակություն ունեն երեխաների առողջության պահպանման գործում։

Մանկական ուրոլոգիայի զարգացումը՝ որպես ռազմավարական ուղղություն

«Ուիգմոր կանանց և երեխաների հիվանդանոց»-ի մանկական ուրոլոգիայի մասնագիտական թիմը կիրառում է ժամանակակից տեխնոլոգիաներ և զարգացնում ոլորտը՝ միջազգային փորձի ինտեգրմամբ։

«Մանկական ուրոլոգիայի զարգացումը պահանջում է ոչ միայն տեխնոլոգիական հնարավորություններ, այլև շարունակական կրթություն և փորձի փոխանակում։ Նման գիտաժողովները հնարավորություն են տալիս համախմբել տարբեր երկրների փորձը և բարձրացնել բժշկական օգնության որակը»,— նշել է «Ուիգմոր»-ի մանկական վիրաբույժ, մանկական ուրոլոգ Կարեն Մելքումյանը։

Նրա խոսքով, նման նախաձեռնությունները նպաստում են նաև Հայաստանի դիրքավորմանը՝ որպես տարածաշրջանային մասնագիտական կենտրոն։

Միջազգային համագործակցություն և կրթական ծրագրեր

Գիտաժողովը «Ուիգմոր»-ի կողմից իրականացվող համակարգային աշխատանքի մի մասն է, որն ուղղված է միջազգային համագործակցության զարգացմանը և բժիշկների շարունակական կրթությանը։

«Կարևոր է, որ նման նախաձեռնությունները իրականացվում են տարածաշրջանում։ Դրանք հնարավորություն են տալիս բժիշկներին քննարկել բարդ դեպքերը և ներդնել ժամանակակից մոտեցումներ առօրյա պրակտիկայում»,- ընդգծել է Բելառուսի Հանրապետության գլխավոր մանկական ուրոլոգ Վիտալի Դուբրովը։

Գիտաժողովը նախատեսված է մանկական ուրոլոգների, մանկական վիրաբույժների, մանկական նեֆրոլոգների, ուրոլոգների և հարակից մասնագետների համար։

Մասնակցությունն անվճար է, մասնակիցներին կտրամադրվի 6 ՇՄԶ կրեդիտ։

📍 Միջոցառման վայրը՝ «Holiday Inn Yerevan» հյուրանոց (Ամիրյան 2)

🗓Ամսաթիվ՝ ապրիլի 30

🔗 Գրանցում