ԱՄՆ-ի կողմից Հորմուզի նեղուցի շրջափակումը բացասաբար կանդրադառնա միջազգային շուկաների վրա․ Պեսկով
2 րոպեի ընթերցում
ԱՄՆ-ի կողմից Հորմուզի նեղուցի շրջափակումը կշարունակի բացասաբար ազդել միջազգային շուկաների վրա։ Ինչպես «Արմենպրես»-ը տեղեկանում է «Ինտեֆաքս» գործակալությունից, այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը։
«Նման գործողությունները, հավանաբար, կշարունակեն բացասաբար ազդել միջազգային շուկաների վրա. սա կարելի է ենթադրել մեծ վստահությամբ։ Այնուամենայնիվ, շատ մանրամասներ մնում են անորոշ և անհասկանալի, ուստի ես վերապահումով կմոտենամ որևէ էական մեկնաբանություն անելուն», - լրագրողների հետ զրույցում ասել է Պեսկովը։
Մեկնաբանությունն արվել է Հորմուզի նեղուցը շրջափակելու մասին Վաշինգտոնի հայտարարությունից հետո։
ԱՄՆ կենտրոնական հրամանատարությունը հայտարարել է, որ ԱՄՆ զինված ուժերն ապրիլի 13-ին կսկսեն իրանական նավահանգիստների շրջափակումը, սակայն չեն խոչընդոտի Հորմուզի նեղուցով նավարկող այն նավերին, որոնք չեն մտել և դուրս չեն եկել իրանական նավահանգիստներից։
Ի պատասխան՝ Իրանի զինված ուժերի խոսնակը հայտարարել է, որ ԱՄՆ-ի կողմից միջազգային ջրերում նավերի նկատմամբ սահմանափակումները անօրինական են և «համարժեք են ծովահենության», և որ Իրանը վճռականորեն կներդնի «մշտական մեխանիզմ»՝ նեղուցը վերահսկելու համար։