2 րոպեի ընթերցում
Իրանի պատվիրակությունն ապրիլի 9-ի երեկոյան կժամանի Իսլամաբադ՝ ԱՄՆ-ի հետ բանակցությունների համար: «Արմենպրես»-ի փոխանցմամբ՝ այս մասին հայտնել է Պակիստանում Իրանի դեսպան Ռեզա Ամիրի Մոգադամը։
«Չնայած իրանական հասարակության մեջ առկա թերահավատությանն Իսրայելի վարչակարգի կողմից հրադադարի ռեժիմի բազմակի խախտումների պատճառով, որոնց նպատակն է խափանել դիվանագիտական նախաձեռնությունը, (Պակիստանի) վարչապետ Շեհբազ Շարիֆի հրավերով այսօր երեկոյան իրանական պատվիրակությունը կժամանի Իսլամաբադ՝ լուրջ բանակցություններ վարելու՝ Իրանի կողմից առաջարկված 10 կետերի հիման վրա», - գրել է նա X-ում։
ԱՄՆ նախագահ Դոնալդ Թրամփը ապրիլի 7-ին հայտարարել է Իրանի հետ երկշաբաթյա փոխադարձ հրադադարի մասին։ Նրա խոսքով՝ կողմերը լուծել են գրեթե բոլոր վիճելի հարցերը, և Վաշինգտոնը որպես «աշխատանքային հիմք» է դիտում հետագա բանակցությունների համար Թեհրանի 10 կետից բաղկացած առաջարկությունները։
Պակիստանի վարչապետ Շեհբազ Շարիֆը, որը երկու կողմերի միջև միջնորդ է, ապրիլի 10-ին նրանց հրավիրել է բանակցությունների։ Իրանի պետական հեռուստատեսության տվյալներով՝ նախատեսվում է անցկացնել ուղիղ բանակցություններ։
Ապրիլի 8-ին Իրանի Մեջլիսի (խորհրդարանի) խոսնակ Մոհամմադ Բաղեր Ղալիբաֆը հայտարարել է, որ բանակցությունների մեկնարկից առաջ խախտվել են հրադադարի համաձայնագրի երեք հիմնական կետեր, որոնց թվում են Լիբանան ներխուժումը, Իրանի օդային սահմանների խախտումը և Իսլամական Հանրապետության կողմից ուրանի հարստացման իրավունքի չընդունումը: