1 րոպեի ընթերցում
Արաբական Միացյալ Էմիրությունների պաշտպանության նախարարությունը հայտարարել է, որ իր հակաօդային պաշտպանության համակարգերն ապրիլի 6-ին որսացել են Իրանից արձակված 12 բալիստիկ հրթիռ, 2 թևավոր հրթիռ և 19 անօդաչու թռչող սարք։ «Արմենպրես»-ի փոխանցմամբ՝ այս մասին հաղորդում է էմիրաթական WAM լրատվական գործակալությունը։
Նախարարությունը նշել է, որ հարվածների հետևանքով չորս մարդ է վիրավորվել։ Այդպիսով, երկրում վիրավորների ընդհանուր թիվը հակամարտության մեկնարկից ի վեր հասել է 221-ի։
Գերատեսչությունը նաև տեղեկացրել է, որ Իրանի կողմից հարձակումների սկզբից ի վեր ԱՄԷ-ի հակաօդային պաշտպանությունը որսացել է 519 բալիստիկ հրթիռ, 26 թևավոր հրթիռ և 2210 ԱԹՍ։
Ավելի վաղ Ֆուջեյրայի իշխանությունները հայտարարել են, որ իրանական անօդաչու թռչող սարքը թիրախավորել է էմիրությունում գտնվող Du հեռահաղորդակցական ընկերության շենքը․ տուժածներ չկան։
Փետրվարի 28-ին ԱՄՆ-ն և Իսրայելն Իրանի դեմ համատեղ ռազմական գործողություն են սկսել՝ մեղադրելով Թեհրանին հրթիռային և միջուկային ծրագիրը զարգացնելու համար։ Իրանը, հերքելով մեղադրանքները, սկսել է պատասխան հարվածներ հասցնել Իսրայելին, ինչպես նաև տարածաշրջանի երկրներում ամերիկյան ռազմաբազաներին և էներգետիկ օբյեկտներին։