Իրանի խորհրդարանի խոսնակը հայտարարել է, որ 7 միլիոն իրանցի պատրաստ է կռվել ԱՄՆ-ի ցամաքային ուժերի դեմ
2 րոպեի ընթերցում
Իրանի խորհրդարանի խոսնակ Մուհամմադ Բաղեր Ղալիբաֆը հայտարարել է, որ 7 միլիոն իրանցի պատրաստ է պայքարել ԱՄՆ-ի կողմից ցամաքային ներխուժման դեմ։ «Արմենպրես»-ի փոխանցմամբ՝ այս մասին նա հայտնել է X-ում գրառման մեջ։
«Հենց հիմա, մեկ շաբաթից էլ քիչ ժամանակում երկրում ծավալված հզոր ազգային արշավն առաջ է բերել մոտ 7 միլիոն իրանցիների, որոնք արդեն իսկ հայտարարել են, որ պատրաստ են զենք վերցնել և պաշտպանել մեր ազգը», - գրել է նա։
Ղալիբաֆը նաև նշել է, որ իրանցիները միայն չեն խոսում իրենց երկիրը պաշտպանելու մասին, այլ պատրաստ են զոհողության։
«Մենք դա արել ենք նախկինում և պատրաստ ենք կրկին դա անել», - հավելել է նա։
Ավելի վաղ Իրանի արտաքին գործերի նախարար Աբբաս Արաղչին հայտարարել էր, որ երկիրը պատրաստ է ԱՄՆ ցամաքային ուժերի հնարավոր ներխուժմանը։
Ավելի վաղ ԱՄՆ-ից հայտարարություններ էին հնչել, որ քննարկվում են բոլոր տարբերակները։
Իսրայելը և ԱՄՆ-ն Իրանի դեմ գործողություններ են սկսել փետրվարի 28-ից՝ հայտարարելով, որ ռազմական արշավի նպատակն է Իրանին հրթիռային ծրագրից և միջուկային զենք ստեղծելու հնարավորությունից զրկելը։ Իրանը պատասխան հարվածներ է հասցնում Իսրայելին, ինչպես նաև տարածաշրջանային երկրներում տեղակայված ամերիկյան ուժերին և էներգետիկ օբյեկտներին։