1 րոպեի ընթերցում
Գեղարքունիքի մարզի Վարդենիս քաղաքում 2018-2025 թվականներին սուբվենցիոն և պետական ծրագրերով սոցիալ-տնտեսական և կենսական նշանակության 20 ծրագիր է իրականացվել, որոնց ուղղությամբ կատարված կապիտալ ներդրումները կազմել են 4 միլիարդ 379 միլիոն 653 հազար 864 դրամ։
Իրականացված ծրագրերից 17-ը սուբվենցիոն են՝ 3 միլիարդ 714 միլիոն 778 հազար 864 դրամ ընդհանուր արժեքով, և 3-ը՝ պետական՝ 664 միլիոն 875 հազար դրամ ընդհանուր արժեքով։
Ինչպես «Արմենպրես»-ին տեղեկացրին Վարդենիսի համայնքապետարանից, իրականացված ծրագրերի արդյունքում Վարդենիսում 2018-2025 թվականներին կառուցվել է 12545 մետր խմելու ջրատարի ներքին ցանց, պոմպակայան, քլորակայան, 2700 մետր կոյուղագիծ, մանկապարտեզի շենք Բանավան թաղամասում, հիմնանորոգվել ներհամայնքային նշանակության 6195 գծամետր ճանապարհ, բազմաբնակարան շենքերի բակերում ասֆալտապատվել է 20351 քմ տարածք, Վարդենիսի թիվ 4 հիմնական դպրոցի մարզադահլիճը։
Վարդենիսի Բանավանի մանկապարտեզի շենքը կառուցվել է 2022-2024 թվականների ընթացքում՝ «300 դպրոց, 500 մանկապարտեզ» ծրագրի շրջանակներում՝ 161 միլիոն դրամ պայմանագրային արժեքով։ Մանկապարտեզը գործում է 2025 թվականի սեպտեմբերից՝ 2 խմբով, 50 սանով։