2 րոպեի ընթերցում
Իսրայելի պաշտպանության բանակը (ԻՊԲ) հայտարարել է, որ գրոհել է Լիբանանի հարավում «Հեզբոլլահ» շիա շարժմանը պատկանող մի շարք ռազմական օբյեկտների վրա։ «Արմենպրես»-ի փոխանցմամբ՝ այս մասին նշված է Telegram-ում տարածված հաղորդագրության մեջ։
«Գիշերն ԻՊԲ-ն հարվածներ է հասցրել Լիբանանի տարածքում գտնվող «Հեզբոլլահ» կազմակերպությանը պատկանող մի շարք թիրախների, այդ թվում՝ Դահիեում գտնվող հրամանատարական կենտրոնին, ենթակառուցվածքային օբյեկտների և ահաբեկիչների։ Նաև հարվածներ են հասցվել «Հեզբոլլահ»-ի կողմից վերահսկվող «Ալ-Ամանա» ընկերությանը պատկանող մի քանի գազալցակայանի», - ասվում է հաղորդագրության մեջ։
Իսրայելի և «Հեզբոլլահ»-ի միջև գործողությունները սկսվել են մարտի 2-ից, երբ լիբանանյան շարժումն Իրանի դեմ ամերիկա-իսրայելական հարվածներին ի պատասխան գրոհ սկսեց Իսրայելի վրա։ Ի պատասխան՝ Իսրայելը լայնածավալ հարվածներ է հասցնում Լիբանանին, այդ թվում՝ երկրի հարավային շրջաններին, Բեքաայի հովտին և Բեյրութի արվարձաններին։
Ավելի վաղ Իսրայելը հայտարարել է, որ բանակը կգրավի Լիբանանի հարավային շրջաններն՝ այնտեղ ստեղծելով պաշտպանական բուֆերային գոտի։