Վլադիմիր Վարդանյանն ընտրվեց Սահմանադրական դատարանի դատավոր

Հայաստանի Ազգային ժողովում կայացած փակ քվեարկության արդյունքներով Վլադիմիր Վարդանյանն ընտրվեց Սահմանադրական դատարանի դատավորի պաշտոնում:

«Արմենպրես»-ի հաղորդմամբ՝ քվեարկության արդյունքները հայտնեց հաշվիչ հանձնախմբի նախագահ Նարեկ Բաբայանը:

ԱԺ 107 պատգամավորներից քվեարկությանը մասնակցել էր 67-ը, որոնք բոլորն էլ կողմ էին քվեարկել Վարդանյանի թեկնածությանը: Օրենքի համաձայն՝ ՍԴ նորընտիր դատավորն ԱԺ նիստում երդվում է:

Վարդանյանը կերդվի մարտի 26-ի նիստում:

Վլադիմիր Վարդանյանի թեկնածությունն առաջադրել էր ՀՀ նախագահը:  

Վլադիմիր Վարդանյանը Սահմանադրական դատարանում կփոխարինի Հրայր Թովմասյանին, որի լիազորությունները դադարեցվել էին՝ հիմք ընդունելով այն հանգամանքը, որ դատարանը նրան մեղավոր էր ճանաչել քրեական վարույթի շրջանակներում առաջադրված մեղադրանքներում։ 

Առաջին ատյանի ընդհանուր իրավասության դատարանը 2024 թվականի սեպտեմբերի 20-ին երկու դրվագով մեղավոր էր ճանաչել Հրայր Թովմասյանին արդարադատության նախարար աշխատած ժամանակահատվածում պաշտոնեական լիազորությունները չարաշահելու համար և նրան ազատել քրեական պատասխանատվությունից վաղեմության ժամկետները անցած լինելու հիմքով։

Դատավճռի դեմ դատախազը վերաքննիչ բողոք էր ներկայացրել, իսկ պաշտպանները խնդրել էին ճանաչել Թովմասյանի անմեղությունը: Վերաքննիչ հակակոռուպցիոն դատարանը մերժել էր բողոքները և դատավճիռն անփոփոխ թողել: Այս որոշման դեմ գլխավոր դատախազը, մեղադրյալը և նրա պաշտպանը ներկայացրել էին վճռաբեկ բողոքներ:

Վճռաբեկ դատարանի հակակոռուպցիոն պալատը 2026 թվականի փետրվարի 12-ին որոշում է կայացրել ներկայացված բողոքները վարույթ ընդունելը մերժելու մասին, ինչը նշանակում է, որ Հրայր Թովմասյանի վերաբերյալ կայացված մեղադրական դատավճիռը 2026 թվականի փետրվարի 12-ից մտել է օրինական ուժի մեջ։