ՀՀ ԱԳ նախարարն ու Օմանի տրանսպորտի, կապի և տեղեկատվական տեխնոլոգիաների նախարարը քննարկել են մի շարք հարցեր
1 րոպեի ընթերցում
Օման պաշտոնական այցի շրջանակներում Հայաստանի արտաքին գործերի նախարար Արարատ Միրզոյանը մարտի 18-ին Մասկատում հանդիպել է Օմանի Սուլթանության տրանսպորտի, կապի և տեղեկատվական տեխնոլոգիաների նախարար Սաիդ բին Համուդ Ալ-Մավալիի հետ։
«Արմենպրես»-ի փոխանցմամբ՝ ՀՀ ԱԳ նախարարությունից հայտնում են, որ Արարատ Միրզոյանն ընդգծել է՝ թեև այցի հիմնական նպատակը Մասկատում ՀՀ ռեզիդենտ դեսպանության պաշտոնական բացումն է, այն լավ հնարավորություն է տվել անցկացնել նաև ոլորտային հանդիպումներ:
Զրուցակիցները մասնավորապես քննարկել են ավիացիայի, տրանսպորտային փոխկապակցվածության խթանման հարցեր՝ երկուստեք ընդգծելով Երևան-Մասկատ ուղիղ չվերթի հաստատումը խթանելու պատրաստակամությունը:
Տարածաշրջանային փոխկապակցվածության զարգացման ՀՀ տեսլականի համատեքստում ՀՀ ԱԳ նախարարը ներկայացրել է «Խաղաղության խաչմերուկ» նախաձեռնությունն՝ ընդգծելով, որ Հայաստանը շահագրգռված է տարածաշրջանային կայունությամբ և դինամիկ տնտեսական գործընկերությունների խթանմամբ:
Արարատ Միրզոյանը և Սաիդ բին Համուդ Ալ-Մավալին մտքեր են փոխանակել նաև տեղեկատվական տեխնոլոգիաների, թվայնացման և նորարարական կրթության, արհեստական բանականության որոտներում լավագույն փորձի փոխանակման հնարավորությունների շուրջ: