2 րոպեի ընթերցում
Իրանում պատերազմական իրավիճակով պայմանավորված՝ դեպի Հայաստան իրանահայերի արտառոց հոսք չկա:
«Արմենպրես»-ի փոխանցմամբ՝ այս մասին ԱԺ-ում լրագրողների հետ զրույցում ասաց ՀՀ սփյուռքի գործերի գլխավոր հանձնակատար Զարեհ Սինանյանը:
Նա նշեց, որ թվային կոնկրետ տվյալ չունեն, թե քանի իրանահայ է այս օրերին եկել Հայաստան:
«Բայց իրանահայերի՝ դեպի Հայաստան որևէ արտառոց հոսք, որը տարբերվում է նախորդ ժամանակահատվածներից, չունենք: Որպես այդպիսին, իրանահայերի շարժ դեպի Հայաստան չկա»,-ասաց Սինանյանը:
Նա վստահեցրեց՝ անընդհատ փորձում են կապի մեջ լինել Իրանի հայ համայնքի հետ, երբեմն ստացվում է կապ հաստատել:
«Մարդիկ փորձում են վտանգավոր վայրերից հեռու մնալ, տներում են, հույս ունեն, որ շուտով այս ամենը կվերջանա»,-նշեց Սինանյանը:
Նրա խոսքով՝ չհաստատված տեղեկություններ կան իրանահայերի շրջանում 2 թեթև վիրավորի մասին:
«Խոսք կար թեթև վիրավորում ստացած 2 իրանահայերի մասին, սակայն շատ դժվար է այդ ամենը հաստատելը»,-նշեց Սինանյանը:
Իսրայելն ու ԱՄՆ-ն փետրվարի 28-ից հայտարարել են Իրանի դեմ ռազմական գործողություններ սկսելու մասին՝ պահանջելով Իրանից դադարեցնել միջուկային և հրթիռաշինական ծրագրերը։ Իրանն իր հերթին հարվածներ է հասցնում Իսրայելին ու Պարսից երկրներում ամերիկյան ռազմաբազաներին և տարբեր ենթակառուցվածքների։