Իրանը հայտնել է Իսրայելի զինագործարանների վրա գրոհելու մասին

Իրանի զինվորականները գրոհել են Իսրայելի Rafael զենք արտադրող ընկերության կենտրոնների վրա: «Արմենպրես»-ի փոխանցմամբ՝ այս մասին հաղորդագրություն է տարածել Իրանի բանակը։

«Գրոհների թիրախ են դարձել Rafael զենքի արտադրության, ինչպես նաև Israel Aerospace Industries (IAI) ավիաարդյունաբերական ընկերության կենտրոնները», - նշվում է հաղորդագրության մեջ, որի տեքստը հրապարակել է Mehr գործակալությունը։

Իրանցի զինվորականները նշել են, որ Rafael-ը զբաղվում է հակաօդային պաշտպանության համակարգերի մշակմամբ, իսկ IAI-ն՝ ռազմական ինքնաթիռների արտադրությամբ։

ԱՄՆ-ն և Իսրայելն Իրանի դեմ համատեղ ռազմական գործողություն են սկսել փետրվարի 28-ից՝ մեղադրելով Թեհրանին հրթիռային և միջուկային ծրագիրը զարգացնելու համար։ Իրանը հերքել է մեղադրանքները և սկսել է պատասխան հարվածներ հասցնել Իսրայելին, ինչպես նաև տարածաշրջանի երկրներում ամերիկյան ռազմաբազաներին։ Հարվածներից տուժել են Կատարը, Քուվեյթը, Արաբական Միացյալ Էմիրությունները, Բահրեյնը, Սաուդյան Արաբիան, Օմանը, Իրաքը։