Ալեն Սիմոնյանը վստահ է՝ կան Հայաստանի երկաթուղու կառավարման իրավունքը գնելու հեռանկարով հետաքրքրված երկրներ
2 րոպեի ընթերցում
Հայաստանի Ազգային ժողովի նախագահ Ալեն Սիմոնյանն անդրադարձել է Հայաստանի երկաթուղու կառավարման իրավունքը Ռուսաստանից այլ երկրների կողմից գնելու հնարավորությանը:
«Արմենպրես»-ի փոխանցմամբ՝ Սիմոնյանը Հայաստանի երկաթուղու կառավարման թեմային անդրադարձավ ԱԺ-ում լրագրողների հետ զրույցում:
«Մենք այս հարցը քննարկում ենք նախևառաջ ռուսական կողմի հետ: Եվ ակնկալում ենք հնարավորինս արագ արձագանք։ Վստահ եմ, որ կան երկրներ, որ հետաքրքրվել են և կուզենան Հայաստանի երկաթուղու կառավարման իրավունքը գնել Ռուսաստանից։ Ես ինքս հանդիպում եմ տարբեր երկրների դեսպանների հետ, բնականաբար, դրա մասին հետաքրքրություն, խոսակցություն կա: Այլ հարց է, թե վերջում ինչ որոշում կլինի»,-ասաց ԱԺ նախագահը:
Ըստ Սիմոնյանի՝ Հայաստանի երկաթուղու կառավարումը Ռուսաստանից վերցնելու վերաբերյալ որոշում չկա, բանակցությունները շարունակվում են:
Ավելի վաղ Հայաստանի երկաթուղու կառավարումը երրորդ երկրի կողմից գնելու հնարավորությանն անդրադարձել էր ՀՀ վարչապետ Նիկոլ Փաշինյանը: Նրա խոսքով՝ Հայաստանը Ռուսաստանի դեմ որևէ բան անելու ցանկություն ու մտադրություն ո՛չ ունեցել է, ոչ էլ ունի: «Բայց հիմա ՌԴ-ի կողմից երկաթուղու կառավարման բերումով մենք մեր դիրքերի կորուստ ու մրցակցային առավելության կորուստ ենք ունենում: Իմ պատկերացրած լուծումն այն է, որ մի այնպիսի երկիր, որը բարեկամական հարաբերություններ ունի և՛ ՌԴ-ի, և՛ Հայաստանի հետ, Ռուսաստանից ուղղակի գնի կոնցեսիոն կառավարման իրավունքը»,-ասել էր վարչապետը: