1 րոպեի ընթերցում
ՀՀ արդարադատության նախարարության «Սևան» քրեակատարողական հիմնարկում բացվել է զոդման ուսումնաարտադրական կենտրոն, որի նպատակն է ապահովել ազատազրկված անձանց աշխատանքային զբաղվածությունը, նպաստել նոր մասնագիտական հմտությունների ձեռքբերմանը և աջակցել վերասոցիալականացման գործընթացին։ «Արմենպրես»-ի փոխանցմամբ՝ այս մասին հայտնում են ՀՀ արդրադատության նախարարության քրեակատարողական ծառայությունից:
Բացման արարողությանը ներկա են գտնվել Քրեակատարողական ծառայության պետ Ծովինար Թադևոսյանը, ԵԽ երևանյան գրասենյակի ներկայացուցիչ Դիանա Ղազարյանը, «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի տնօրեն Գևորգ Սիմոնյանը, ծառայության ղեկավար անձնակազմը։
Զոդման դասընթացներն իրականացվելու են «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի կողմից։ Ծրագրի արդյունավետ կազմակերպման նպատակով ձեռք են բերվել ժամանակակից սարքավորումներ, հաստոցներ և անհրաժեշտ այլ պարագաներ։