Գեղարքունիքի մարզի Արծվանիստ գյուղում 2018-2025 թվականներին սոցիալ- տնտեսական նշանակության 19 ծրագիր է իրականացվել
2 րոպեի ընթերցում
Գեղարքունիքի մարզի Մարտունի համայնքի Արծվանիստ գյուղում 2018-2025 թվականներին սուբվենցիոն և պետական այլ ծրագրերով սոցիալ-տնտեսական և կենսական նշանակության 19 ծրագիր է իրականացվել, որոնց ուղղությամբ ներդրված գումարի ընդհանուր չափը կազմել է 1 միլիարդ 132 միլիոն 890 հազար 912 դրամ:
Ինչպես «Արմենպրես»-ին տեղեկացրեց Արծվանիստի վարչական ղեկավար Ռուբիկ Սիրականյանը, իրականացված 19 ծրագրերից սուբվենցիոն են 17-ը, որոնց իրականացման ուղղությամբ ներդրվել է 485 միլիոն 721 հազար 940 դրամ։ Մնացած երկու պետական ծրագրերով հիմնանորոգվել են ներհամայնքային ճանապարհները՝ 404 միլիոն 168 հազար 972 դրամ արժեքով և մանկապարտեզի շենքը՝ 243 միլիոն դրամ արժեքով։
Իրականացված ծրագրերի արդյունքում 2018-2025 թվականների ընթացքում Արծվանիստում կառուցվել է 3700 մետր ոռոգման, 8500 մետր խմելու ջրատար ցանցեր, 7280 մետր արտաքին լուսավորության ցանց, 3 աղբյուրակապ և սնուցող ջրատար, հիմնանորոգվել 5760 գծամետր ներհամայնքային նշանակության ճանապարհ, մանկապարտեզի շենքի տանիքը։ Ընթացքի մեջ են գտնվում մանկապարտեզի շենքի հիմնանորոգման աշխատանքները, որոնց մեկնարկը տրվել է 2025 թվականի ապրիլից։ Շինարարական աշխատանքները նախատեսվում է ավարտի հասցնել 2026 թվականի օգոստոսին։
Արծվանիստի մանկապարտեզի գործունեությունը դադարեցվել է 2016 թվականից՝ շենքային անբավարար պայմանների պատճառով։ Պետական ծրագրով հիմնանորոգված ճանապարհը տանում է դեպի միջնադարյան Հայաստանի պատմաճարտարապետական գլուխգործոցներից մեկը համարվող Վանեվան վանական համալիր՝ նպաստելով գյուղում զբոսաշրջության զարգացմանը։