Թուրքիայում F-16 կործանիչ է կործանվել, օդաչուն մահացել է

Թուրքիայի 9-րդ գլխավոր ավիաբազային պատկանող F-16 կործանիչը փետրվարի 25-ի գիշերը Բալըքեսիր նահանգում պլանային չվերթի ժամանակ վթարի է ենթարկվել։

Ինչպես հաղորդում է «Արմենպրես»֊ը, այդ մասին հայտնում են թուրքական ԶԼՄ֊ները։

Ինքնաթիռը կործանվել է տեղական ժամանակով մոտավորապես ժամը 00:50-ին։ Օդաչուն զոհվել է:

T24-ի տվյալներով՝ կործանիչը կործանվել է Ստամբուլ-Իզմիր մայրուղու տարածքում՝ Նաիֆլի գյուղի մոտակայքում։ Բեկորները ցրվել են մեծ տարածքի վրա, ինչի պատճառով անհրաժեշտ է եղել փակել մայրուղու մի հատվածը։

Դեպքի վայր են ուղարկվել հրշեջներ, ոստիկաններ և շտապօգնության աշխատակիցներ։

Բալըքեսիրի նահանգապետ Իսմայիլ Ուսթաօղլուն հայտարարել է, որ վթարի պատճառը դեռևս պարզված չէ և ընդգծել է, որ հետաքննությունը համատեղ վարում են զինվորականները և դատախազությունը։