1 րոպեի ընթերցում
Գեղարքունիքի մարզի Սևան համայնքի մարզադպրոցի ծանրամարտիկներ Ալինա Սուքիասյանը և Հովհաննես Հովհաննիսյանը մրցանակներով են վերադարձել Երևան քաղաքում՝ սպորտի կառավարման կենտրոնում, տեղի ունեցած ՀՀ մեծահասակների ծանրամարտի առաջնությունից:
Ինչպես «Արմենպրես»-ին տեղեկացրին Սևանի համայնքապետարանի աշխատակազմից, Սևան համայնքի Ն. Դագարյանի անվան մանկապատանեկան մարզադպրոցի ծանրամարտիկ, մարզիչ Գառնիկ Աբրահամյանի սան Ալինա Սուքիասյանը 77 կգ քաշային կարգում երկամարտի 205 կգ արդյունքով գրավել է 2-րդ տեղը:
Ալինա Սուքիասյանը մի շարք առաջնությունների մասնակից է և Հայաստանի ու Սևանի մարզական պատիվը բարձր է պահել` արժանանալով մրցանակների:
Սևանը ներկայացնող մյուս ծանրամարտիկը՝ Հովհաննես Հովհաննիսյանը, բազմիցս է փայլել իր հաղթական մրցելույթներով և սևանցիներին պարգևել է հպարտության անկրկնելի պահեր:
Այս առաջնությանն էլ Գառնիկ Աբրահամյանի սան Հովհաննեսը 79 կգ քաշային կարգում երկամարտի 309 կգ արդյունքով գրավել է 3-րդ պատվավոր հորիզոնականը:
Սևանում շուքով են դիմավորել մրցանակակիր ծանրորդներին։
Խոսրով Խլղաթյան