Վրաստանն ու Իտալիան պայմանավորվել են խորացնել համագործակցությունը պաշտպանության և անվտանգության ոլորտում
1 րոպեի ընթերցում
Իտալիայի մայրաքաղաք Հռոմում՝ Ռազմածովային պալատում, տեղի է ունեցել հանդիպում Վրաստանի պաշտպանության նախարարի առաջին տեղակալ Պաատա Պատիաշվիլի և իր իտալացի գործընկեր Մատեո Պերեգո դի Կրեմնագոյի միջև։
«Արմենպրես»-ի հաղորդմամբ՝ այս մասին հայտնում է GruziaOnline-ը՝ մանրամասնելով, որ կողմերը քննարկել է Վրաստանի և Իտալիայի միջև երկկողմ պաշտպանական համագործակցությունը։
Նշվում է, որ հանդիպման ընթացքում կողմերը քննարկել են երկկողմ համագործակցության դինամիկան և դրա խորացման հեռանկարները։ Նրանք նշել են երկրների միջև բարձր մակարդակի երկխոսության և խորհրդակցությունների շարունակականության կարևորությունը, որը կնպաստի առկա գործընկերության և վստահության ամրապնդմանը։
Զրուցակիցները նաև անդրադարձել են տարածաշրջանային անվտանգության հարցերին և առկա մարտահրավերներին։
Հաղորդվում է, որ պաշտոնյաները համաձայնել են շարունակել աշխատանքը պաշտպանության և անվտանգության ոլորտում համագործակցության խորացման ուղղությամբ։
Այցի ընթացքում Վրաստանի պաշտպանության նախարարի առաջին տեղակալն այցելել է նաև Իտալիայի պաշտպանական արդյունաբերության խոշորագույն ընկերություն՝ Leonardo SpA։