366.14
Հայկ Կոնջորյանն ընդունել է Հայաստանում Շվեդիայի դեսպանին
2 րոպեի ընթերցում
Հայաստանի Հանրապետության Ազգային ժողովի «Քաղաքացիական պայմանագիր» խմբակցության ղեկավար Հայկ Կոնջորյանը փետրվարի 12-ին ընդունել է Հայաստանում Շվեդիայի Թագավորության արտակարգ եւ լիազոր դեսպան Եվա Սունդքվիստին:
Ինչպես «Արմենպրես»-ը տեղեկանում է ՀՀ ԱԺ-ի տարածած հաղորդագրությունից, ողջունելով դեսպանին՝ Հայկ Կոնջորյանը կարեւորել է Հայաստան-Շվեդիա սերտ համագործակցությունը: Խմբակցության ղեկավարն ընդգծել է տարբեր ուղղություններով փոխգործակցությունը զարգացնելու անհրաժեշտությունը:
Հայկ Կոնջորյանը բարձր է գնահատել Շվեդիայի աջակցությունը Հայաստանում ժողովրդավարական բարեփոխումների գործընթացին: Այդ համատեքստում ընդգծվել է ՄԱԶԾ «Նոր Հայաստան` ժամանակակից խորհրդարան» ծրագրի իրականացումը, որը, խմբակցության ղեկավարի գնահատմամբ, նպաստել է ԱԺ աշխատակազմի մասնագիտական եւ փորձագիտական կարողությունների ուժեղացմանը:
Զրուցակիցները մտքեր են փոխանակել Հայաստան-Եվրամիություն ընդլայնվող գործակցության, տարածաշրջանային զարգացումների, ինչպես նաեւ հունիսին տեղի ունենալիք խորհրդարանական ընտրությունների վերաբերյալ:
Շնորհակալություն հայտնելով ընդունելության համար՝ Եվա Սունդքվիստը խոսել է երկկողմ համագործակցության օրակարգից՝ ներկայացնելով Հայաստանում Շվեդիայի կողմից իրականացվող բազմաթիվ ծրագրերը:
Բաժանորդագրվեք մեր ալիքին Telegram-ում