Իգդիրի նահանգապետը ստուգել է Հայաստանի հետ սահմանի «Ալիջան» անցակետում իրականացվող աշխատանքները
1 րոպեի ընթերցում
Իգդիրի նահանգապետ Ֆըրաթ Թաշոլարը ծանոթացել է Հայաստանի հետ սահմանի «Ալիջան» սահմանային անցակետում իրականացվող վերանորոգման և ենթակառուցվածքային աշխատանքներին և տեղեկություններ ստացել գործընթացի մասին։
Ինչպես հաղորդում է «Արմենպրես»-ը, այս մասին հայտնում է «Yesiligdir»-ը:
Նահանգապետ Թաշոլարը տեխնիկական խմբի ուղեկցությամբ զննել է սահմանային գծի երկայնքով գտնվող շենքերն ու անցման ուղիները։
Ստուգայցի ընթացքում նահանգապետն ընդգծել է, որ աշխատանքները նախատեսվում է ավարտել կարճ ժամանակում։
Նշվել է, որ «Ալիջան» սահմանային անցակետի բացումը ոչ միայն դիվանագիտական քայլ է, այլև մեծ խթան տարածաշրջանային տնտեսության համար։
Ընդգծվել է, որ սահմանային անցակետի ակտիվացմամբ հետապնդվում են հետևյալ նպատակները.
• Սահմանային առևտրի վերակենդանացում. Իգդիրում և հարակից նահանգներում առևտրային ակտիվության աճ։
• Լոգիստիկ առավելություն. Կովկասով տրանսպորտի համար ավելի կարճ երթուղիներ։
• Զբոսաշրջային շարժունակություն. երկու երկրների միջև փոխադարձ այցելություններ, որոնք նպաստում են տարածաշրջանային զբոսաշրջությանը: