Ընդլայնվում են ԲԿ-ների գործադիր մարմիններում ընդգրկվողների մասնագիտական կրթության վերաբերյալ պահանջները
1 րոպեի ընթերցում
Առողջապահության նախարարությունն առաջարկում է ընդլայնել բժշկական կենտրոնների գործադիր մարմիններում ընդգրկվող անձանց մասնագիտական կրթության վերաբերյալ պահանջները:
«Արմենպրես»-ի փոխանցմամբ՝ հարցը կառավարության նիստում ներկայացրեց Առողջապահության նախարար Անահիտ Ավանեսյանը:
«Մենք ընդլայնում ենք բժշկական կազմակերպությունների գործադիր մարմիններում ընդգրկվող անձանց մասնագիտական կրթության վերաբերյալ պայմանները, որովհետև ՓԲԸ-ները, հանդիսանալով նաև շահույթ հետապնդող ձեռնարկատիրական կազմակերպություններ, պետք է հնարավորություն ունենան ընդգրկելու ղեկավար կազմում նաև այնպիսի անձանց, որոնք ունեն համապատասխան կրթություն, որը չպետք է սահմանափակվի միայն բժշկական կրթությունով։ Նրանք պետք է համապատասխանեն նաև գործադիր մարմիններում աշխատանքային փորձի բավարար պայմանին»,-ասաց Ավանեսյանը:
Նախարարը նշեց՝ փոփոխությունը նպատակ ունի պետական մասնաբաժին ունեցող բժշկական կենտրոնները դարձնել ֆինանսապես կայուն, զարգացող, ինչպես նաև ներդնել չափելի ինդիկատորներ, որոնցով հնարավոր կլինի գնահատել կառավարիչների աշխատանքային գործունեությունը: