Հոնկոնգի գիտնականները գործարկել են հորդառատ տեղումները կանխատեսող արհեստական բանականության համակարգ
1 րոպեի ընթերցում
Հոնկոնգի գիտնականների խումբը մշակել է եղանակի կանխատեսման արհեստական բանականության համակարգ, որը կարող է չորս ժամ առաջ կանխատեսել ամպրոպները և ուժեղ անձրևները։ Ներկայիս համակարգերը կարողանում են կանխատեսել տեղումները 20 րոպեից մինչև երկու ժամ առաջ։ Ինչպես հաղորդում է «Արմենպրես»-ը, այս մասին հայտնում է Reuters-ը։
Համակարգը մշակել է Հոնկոնգի գիտության և տեխնոլոգիաների համալսարանի թիմը։ Հեղինակները հայտարարել են, որ այն կօգնի կառավարություններին և արտակարգ իրավիճակների ծառայություններին ավելի արդյունավետ արձագանքել կլիմայի փոփոխություններով պայմանավորված եղանակային ծայրահեղ դրսևորումներին, որոնք ավելի ու ավելի հաճախակի են դառնում։
«Մենք հույս ունենք օգտագործել արհեստական բանականությունը և արբանյակային տվյալները՝ եղանակի կանխատեսումը բարելավելու համար, որպեսզի կարողանանք ավելի լավ պատրաստված լինել», - ասել է նախագծի ղեկավար, պրոֆեսոր Սու Հուին։
Չինաստանի օդերևութաբանական ծառայությունների հետ համագործակցությամբ մշակված այս համակարգը թարմացնում է կանխատեսումները յուրաքանչյուր 15 րոպեն մեկ։ Այն ավելացրել է կանխատեսումների ճշգրտությունը ավելի քան 15%-ով։