1 րոպեի ընթերցում
Ինդոնեզիայի Ճավա կղզում հորդառատ անձրևների հետևանքով առաջացած սողանքը խլել է 8 մարդու կյանք, ևս 82-ը համարվում է անհետ կորած։ «Արմենպրես»-ի հաղորդմամբ՝ այս մասին հայտնում է տեղական Kompas հեռուստաալիքը։
Սողանքը տեղի է ունեցել հունվարի 24-ի վաղ առավոտյան Պասիր Լանգու գյուղում (Արևմտյան Ճավա նահանգի Արևմտյան Բանդունգի շրջան)։ Մի քանի օր տևած ուժեղ անձրևների պատճառով գետերը դուրս են եկել հունից, իսկ ջրի և ցեխի հեղեղները ավերել և ծածկել են լեռնային բնակավայրերի տները։
«Փրկարարները որոնում են 82 բնակչի, որոնք, հնարավոր է, մնացել են ցեխի և փլատակների տակ։ 24 մարդու հաջողվել է փրկվել»,-հայտնել է բնական աղետների հետևանքների վերացման Ինդոնեզիայի ազգային գործակալության ներկայացուցիչ Աբդուլ Մուհարին։ Նշվում է, որ 8 զոհերի մարմինները հայտնաբերվել են արհավիրքից ամենից շատ տուժած Պասիր Կունինգ բնակավայրում։
Սողանքի գոտուց 100 մետր շառավղով տարածքում բնակվող մարդիկ տարհանվել են նոր փլուզումների վտանգի պատճառով։