3 րոպեի ընթերցում
«Ֆուլ հաուս» սիթքոմը, որը տարիների ընթացքում երկրպագուների մեծ բանակ է հավաքել, վերադառնում է նոր ձևաչափով։ Այն իր շարունակությունը կունենա լիամետրաժ ֆիլմի տեսքով։ «Ֆուլ հաուս. վայրէջք» կինոնկարը երևանյան մեծ էկրան կբարձրանա հունվարի 29-ին։
Հանդիսատեսը ֆիլմում կտեսնի սիրված կերպարներին՝ նոր դրսևորումներով, նոր մոտեցումներով, սակայն կլինեն հերոսներ, որոնք ինչ-ինչ պատճառներով կբացակայեն ֆիլմից։ Նրանցից է Քրիստինա Եղոյանի մարմնավորած կերպարը՝ Զառան։
Քրիստինան այժմ բնակվում է ԱՄՆ-ում։ «Արմենպրես»-ի թղթակցի հետ զրույցում դերասանուհին ափսոսանքով է նշում, որ նկարահանումներից երկու ամիս առաջ այնպիսի խոչընդոտներ են ի հայտ եկել, որոնք թույլ չեն տվել մասնակցել ֆիլմի ստեղծմանը, սակայն ոգևորությամբ է սպասելու «Ֆուլ հաուս. վայրէջք»-ի ամերիկյան պրեմիերային։
Քրիստինա Եղոյանը նախորդ տարի մասնակցել էր «Ֆուլ հաուս»-ի տասնամյակին նվիրված համերգ-ներկայացումներին։
«Մայիսին Լոս Անջելեսում կայացած երեք ներկայացումների տոմսերն ամբողջությամբ սպառվել էին։ Այդ օրերին հասկացա, որ ամենաշատը կարոտել եմ հայրենակիցներիս սերը, ջերմ ծափերն ու հիացմունքի խոսքերը: Այս տարի փետրվարի 8-ին Լոս Անջելեսում ֆիլմի ամերիկյան պրեմիերան է լինելու։ Ներկա եմ լինելու, որպեսզի վայելեմ բոլորիս կողմից շատ սիրված նախագիծը՝ գեղարվեստական ֆիլմի ձևաչափով»,-նշում է Եղոյանը։
Հեղինակներն ի սկզբանե մտադիր չեն եղել «Ֆուլ հաուս»-ը որպես գեղարվեստական ֆիլմ շարունակել, սակայն սիթքոմի նկարահանման տարիներին դերասանները հաճախ են խոսել այդ մասին, կատակել են այդ թեմայի շուրջ։
«Մարդիկ այնքան շատ են սիրում այս նախագիծը, որ ամեն օր խոսում են այդ մասին, հիշեցնում այս կամ այն արտահայտությունը, կրկնօրինակում են Զառայի շարժուձևը, ծիծաղը: «Ֆուլ Հաուս»-ը պարզապես նախագիծ չէ, որն ավարտվել է ու մնացել կյանքի որևէ փուլում»,-եզրափակում է Քրիստինա Եղոյանը:
«Ֆուլ հաուս. վայրէջք» ֆիլմում նկարահանվել են Արմեն Պետրոսյանը, Գրիգոր Դանիելյանը, Գարիկ Սեփխանյանը, Միհրան Ծառուկյանը, Արփի Գաբրիելյանը, Աղաս Մանուկյանը, Մարջան Ավետիսյանը, Մոսո Կարապետյանը, Անի Երանյանը, Գոռ Հակոբյանը և այլք:
Պրոդյուսերն Արմեն Պետրոսյանն է, սցենարի հեղինակներն են Գրիգոր Դանիելյանն ու Գարիկ Սեփխանյանը, ռեժիսորը Կարեն Ամյանն է: